Misiyo y’Umuryango w’Abibumbye muri Repubulika ya Centrafrika (MINUSCA) yatangaje ko yabonye imirambo y’abantu 13 bo mu Ntara ya Bossangoa itaramenya ababishe.
Nk’uko bigaragara mu itangazo ryayo, MINUSCA ivuga ko yamenye amakuru y’urupfu rw’aba bantu tariki ya 21 Nyakanga 2021, ihita yohereza abasirikare n’abapolisi kugira ngo bayagenzure.
Iti: “Ubu burinzi (patrol) bwemeje ko bwabonye imirambo y’abantu 13 muri Bongboto, mu bilometero 12 uvuye muri Bossangoa.”
Nyuma yo kubona iyi mirambo, MINUSCA yahise yohereza abapolisi n’abaharanira uburenganzira bw’ikiremwamuntu kugira ngo bakoreho iperereza, yiyemeza gushakisha ukuri ku mpamvu yaba yateye urupfu rw’aba baturage.
Yabivuze iti: “MINUSCA izafasha mu kugaragaza umucyo kuri ibi byago, kandi yiteguye gufasha Leta, abishi bakamenyekana, bagafungwa, bakanagezwa imbere y’inkiko zibifitiye ububasha.”
Bikekwa ko abarwanyi b’ihuriro ry’imitwe yitwaje intwaro irwanya Leta ya CAR ryitwa CPC ari bo baba bishe aba baturage.
