Umuvugizi wa misiyo y’Umuryango w’Abibumbye ishinzwe kubungabunga amahoro n’umutekano muri Repubulika ya CentrAfrika (MINUSCA), Lt. Col. Abdoulaziz Fall yatangaje ko abarwanyi b’umutwe witwaje intwaro wa 3R bagabye igitero ku birindiro by’ingabo za Leta, bica n’abasivili 6.
Byebereye mu gace ka Mann hafi y’umupaka wa Chad na Cameroon, mu rukerera rwo kuri uyu wa 31 Nyakanga 2021.
Col. Fall yabwiye ibiro ntaramakuru by’Abafaransa, AFP, ati: “Mu rukerera, abarwanyi b’umutwe wa 3R bagabye igitero ku birimdiro by’ingabo za CentrAfurika mu gace ka Mann. Abasivili 6 bishwe, hari abandi bakomeretse.”
Uyu musirikare yavuze ko ingabo ziri mu butumwa bw’amahoro zafashije iza Leta gusubiza inyuma aba barwanyi, umutekano wo muri Mann no mu tundi duce tuhegereye ukaba wagarutse.
Iki gitero gikurikiye ikindi abarwanyi b’umutwe witwaje intwaro bagabye ku wa Mbere w’iki cyumweru. Cyaguyemo umusirikare umwe wa CAR, gikomerekeramo undi wa MINUSCA.
