Abaturage batuye mu Mudugudu wa Kigarama, Akagari ka Bukomeye, Umurenge wa Mukura mu Karere ka Huye kuri uyu wa 26 Nzeri 2020 bitabiriye umuganda bakora ibikorwa birimo kubaka umuhanda no kubakira inzu abatishoboye, ku bufatanye n’Inama y’Igihugu y’Abagore ku rwego rw’Intara.
Iki gikorwa cyateguwe n’iyi Nama y’Abagore, cyitabiriwe n’umuyobozi wayo ku rwego rw’Intara y’Amajyepfo, Guverineri w’Intara y’Amajyepfo, Umuyobozi wa Polisi muri iyi Ntara, Meya w’Akarere ka Huye.
Guverineri Kayitesi Alice na CSP Innocent Kanyamihigo uhagarariye Polisi mu Ntara y’Amajyepfo
Mu byakozwe mu Mudugudu wa Kigarama, uretse kubaka umuhanda w’ikilometero kimwe ubahuza n’Ikigo Nderabuzima cya Mukura no kubakira abatishoboye, abitabiriye umuganda bakurungiye amazu ndetse babumba amatafari azubakishwa inzu z’abatishoboye.
Guverineri w’Intara y’Amajyepfo, Kayitesi Alice yavuze ko uyu munsi wari uwo gutangiza ibikorwa bizakorwa mu Midugudu ntangarugero igizwe na ba Mutima w’Urugo, ku rwego rw’Intara bikaba byahereye muri uyu Murenge wa Mukura.
Yavuze ki ibizagenda bikorwa birimo kwita ku bikorwa by’isuku, gukurungira amazu, guca nyakatsi ku buriri, guca amakimbirane mu muryango. Yasabye abaturage ko ibikorwa byose biri muri iyo mihigo babigiramo uruhare.
Meya w’Akarere ka Huye, Sebutege Ange, yashimiye abagize inama y’Igihugu y’Abagore ku rwego rw’Intara y’Amajyepfo kuba batekereje kujya kwifatanya n’abatuye mu murenge wa Mukura.
Meya wa Huye, Sebutege Ange
Meya Sebutege yaboneyeho gusaba abaturage guharanira imibereho myiza, kwibumbira mu matsinda abateza imbere ndetse abibutsa ko igihe cy’ihinga kigeze, bagomba kubikora kare nk’uko babimenyeshejwe n’abashinzwe gupima ibijyanye n’ikirere.
Ku bijyanye n’icyorezo cya Covid-19 gihangayikishije Isi, Meya Sebutege yavuze ati: “Umwanzi turwana Covid-19 ntaho arajya” aboneraho gukangurira abaturage gukomeza kucyirinda, bubahiriza amabwiriza bahabwa n’inzego z’ubuzima.
Kampororo Jeanne d’Arc uhagarariye Inama y’Igihugu y’Abagore mu Ntara y’Amajyepfo, na we yashimiye abaturage uburyo bitabiriye umuganda ku bwinshi, asaba abagore ahagarariye “kuzagira uruhare mu mihigo ya Mutima w’Urugo.”
Kampororo Jeanne d’Arc uhagarariye iyi Nama mu Ntara
Abaturage bishimiye kuba uyu muganda wakorewe mu Mudugudu wabo, by’umwihariko bakavuga ko umuhanda bubatse uzaborohereza kugera kugera ku Kigo Nderabuzima. Kuba batoranyijwe bwa mbere, byabahaye icyizere, nabo bakaba biyemeje kugisigasira, bakaba “nkore neza bandebereho.”
Abaturage biyemeje kuba intangarugero mu kwiteza imbere
