Umunyamabanga wa Leta zunze ubumwe za Amerika (USA) wungirije, Victoria Nuland, yahuye n’akazi katoroshye ubwo yajyaga gusaba abahiritse ubutegetsi bwa Niger ko Perezida Mohamed Bazoum arekurwa.
Abasirikare bayobowe na General Abdoulamane Tchiani bakuye Bazoum ku butegetsi tariki ya 26 Nyakanga 2023. USA iri mu bihugu byafashe iya mbere mu kwamagana iri hirika, bisaba ko uyu munyapolitiki asubira ku butegetsi byihuse.
Umuryango w’ibihugu bigize akarere ka Afurika y’uburengerazuba, ECOWAS, wateguje abasirikare bo muri Niger ko uzifashisha imbaraga z’igisirikare mu gihe Bazoum atasubizwa ku butegetsi. Ubutegetsi bwa USA bwatangaje ko bushyigikiye uyu muryango.
Nuland, mu ijoro ryo kuri uyu wa 8 Kanama 2023, yatangaje ko yagiriye uruzinduko muri Niger, asaba abasirikare bo muri iki gihugu ko Bazoum asubizwa ku butegetsi. Ati: “Nagiye muri Niamey kugaragaza ko duhangayikishijwe bikomeye n’igikorwa kitari icya demukarasi cyageragejwe cyo gufata ubutegetsi, kandi nasabye ko gahunda y’itegekonshinga isubiraho.”
BBC yatangaje ko Nuland yaganiriye na General Tchiani, uyu Munyamerikakazi asaba ko Bazoum arekurwa, kandi ngo ikiganiro bagiranye cyarimo ukuri, ariko “kinakomeye cyane”.
Bazoum ntiyemera ko atakiri Perezida wa Niger, ndetse yanasabye USA n’andi mahanga kumusubiza ku butegetsi. Abasirikare bayobowe na General Tchiani na bo ntabwo baremera kumurekura, ahubwo batangaje ko igihugu cyabo nigiterwa, bazarwana.
