Ishyaka Amahoro People’s Congress rirwanya Leta y’ u Rwanda ryikuye mu Mpuzamashyaka RBB ryashinzwe na Kayumba Nyamwasa rivuga ko ryasanzwe ari imitwe ryatekewe n’uyu wahoze ari jenerali muri RDF ngo arye utwaryo. Amakuru yiriwe acicikana mu mbuga nkoranyambaga z’abarwanya Leta y’u Rwanda, aravuga ko Ishyaka Amahoro People Congress ryasezeye mu mpuzamashyaka RBB (Rwanda building Builders). Umwe mu bagize Ishyaka Amahoro People Congress, utashatse ko amazina ye atangazwa k’ubwumutekano we yabwiye itangazamakuru ko basanze iri Huriro ari igikoresho cyashizweho na Kayumba Nyamwasa kugira ngo agire akaboko mu kugenzura amashyaka yose ari mu cyitwa opozisiyo no kuyarya utwabo. Mu bibazo bivugwa muri RBB ni ikibazo cya bamwe mu bayigize bavuga habaye jenoside ebyiri, abandi bakavuga ko iyo bemera ari iyemejwe na ONU/UN, iyakorewe Abatutsi.
