Bertrand Bisimwa, Rais wa kundi la waasi la M23, amekanusha vikali tuhuma za Ofisi ya Pamoja ya Haki za Binadamu ya Umoja wa Mataifa (UNJHRO), zilizodai kuwa M23 waliua raia 169 huko Rutshuru, mashariki mwa DRC.
Akizungumza na Reuters, Bisimwa alisema tuhuma hizo zilitokana na taarifa za mtu anayejulikana kama Mulumba, msemaji wa FDLR, na kwamba UN ilikosea kuchapisha habari zisizothibitishwa.
Mnamo Julai 31, Reuters iliripoti kuwa Umoja wa Mataifa ulidai wapiganaji wa M23 waliwaua watu 169—wakulima na raia—mwanzo wa mwezi huo.
Bisimwa alisema watafanya uchunguzi, lakini alisisitiza kuwa taarifa hizo ni sehemu ya kampeni ya kuharibu jina lao.
Katika mahojiano na Voice of Congo, aliilinganisha na madai ya awali kuhusu mauaji ya Kishishe, ambayo alidai yalibuniwa.
“Unajua walichofanya Kishishe? Walibuni hadithi, wakadai ni ushuhuda, kisha wakaichapisha. Lakini hakuna kaburi, hakuna jina la marehemu hata mmoja hadi leo.”
Aliendelea kusema kuwa mbinu hiyo hiyo imejaribiwa tena kwa idadi ya vifo 169.
“Sasa wanasema eti wamepokea habari kutoka vyanzo fulani. Yaani hawajathibitisha chochote. Ofisi ya haki za binadamu ya UN imepwaya. Walipaswa kufanya uchunguzi wao binafsi. MONUSCO ipo, ofisi iko Kinshasa. Kwa nini wasitumie kamati maalum kuchunguza kabla ya kutoa ripoti nzito namna hii?”
Bisimwa alidai taarifa hizo zilitegemea Mulumba, msemaji wa FDLR, ambaye UN ilichukua taarifa zake na kuzifanya kama habari rasmi.
“Kwa kweli, ni propaganda tu. Tulishauri wateue tume ya uchunguzi—hawajafanya hivyo. Hawatafanya. Wanajua ni uongo.”
Aliongeza kuwa mfanyakazi mmoja raia wa Kongo ndani ya UNJHRO ndiye chanzo cha propaganda nyingi za uongo.
“Lengo lao halisi lilikuwa kufunika mauaji ya Komanda, ambapo raia waliuawa makanisani na jeshi la FARDC lilihusika. Ili kuondoa macho ya umma huko, wakabuni hadithi nyingine.”
Reuters yenyewe ilisema haiwezi kuthibitisha kwa uhuru mauaji hayo, lakini wanaharakati wa eneo hilo walisema wapiganaji wa M23 walitumia bunduki na mapanga kuua raia wengi.
