Ikigo cy’u Burundi gishinzwe gukusanya imisoro n’amahoro, OBR, kirishyuza Umurundikazi witwa Nitereka Charlotte imisoro y’amafaranga akoreshwa iwabo (FBU) miliyari 52,683,428.785 (miliyari zirenga 26 z’amafaranga y’u Rwanda).
Itangazo rigaragara ku rubuga rwa Twitter rwa OBR ryashyizweho umukono na Komiseri Mukuru wayo, Pacifique Munyenshongore tariki ya 3 Kanama 2021, rirebana n’ukwishuza Nitereka, rigira riti: “Ikigo gishinzwe gukusanya imisoro n’amahoro, OBR, kiramenyesha Nitereka Charlotte (hakurikiraho imyirondoro ye) ko hashingiwe ku ngingo za 68 na 98 z’itegeko No1/12 ryo ku wa 25/11/2020 rigenga uburyo imisoro n’amahoro akusanywa, ko Nitereka yibukijwe kwishyura imisoro ingana na 52,683,428.785 FBU.”
Komiseri Munyeshongore yamenyesheje Nitereka ko niyica amatwi, ntiyishyure iyi misoro, azafatirwa ingamba hashingiwe ku mategeko.
