Abarwanyi b’umutwe w’iterabwoba wa Al Sunnah wa Jama’ah baravugwaho kugaba ibitero mu ntara ya Niassa bavuye muri Cabo Delgado muri Mozambique bashinzemo ibirindiro kuva mu 2017.
Ibitangazamakuru byo muri Mozambique bivuga ko aba barwanyi bagabye igitero cya mbere ku wa Kane w’icyumweru gishize mu Mudugudu wa Gomba uri mu bilometero bigera ku 150 ugana mu muyi wa Mecula.
Muri iki gitero, ngo barashe imodoka y’abakozi ba Pariki y’igihugu ya Niassa.
Abaturage bavuga ko babanje gukeka ko ari abahigi bagabye iki gitero, ariko baje kumenya ko ari aba barwanyi ubwo ku wa Gatandatu bagabaga ikindi kuri sitasiyo ya Polisi ya Naulala iri mu bilometero 60 ugana Mecula. Icyo gihe ngo barasanye n’abapolisi babasubizaga inyuma, umwe mu bapolisi ahasiga ubuzima.
Aba barwanyi baravugwaho kwiba imiti mu kigo nderabuzima cyo muri aka gace, kwangiza ibikoresho byaho, no gutwika n’inzu ebyiri z’abaturage.
Ntacyo Leta ya Mozambique iratangaza kuri ibi bitero, gusa mu cyumweru gishize, Dinis Vilanculos uhagarariye Niassa muri Guverinoma yasabye abatuye mu turere twa Mecula na Marrupa kuba maso, kuko ngo byashoboka ko aba barwanyi bakwinjira muri iyi ntara.
Kwinjira muri Niassa kw’aba barwanyi kwaba ari ingaruka yo gutsindwa n’ingabo za Mozambique, iz’u Rwanda n’iz’ibihugu bigize umuryango wa Afurika y’amajyepfo ziri muri Cabo Delgado, zifatanya mu rugamba rwo kurwanya uyu mutwe w’iterabwoba kuva muri Nyakanga 2021.
