Perezida wa Repubulika Yunze Ubumwe ya Tanzania, Samia Suluhu Hassan yatangaje ko igihugu ayoboye atari ikirwa ku buryo kitakwifatanya n’ibindi muri gahunda yo gukingira icyorezo cya Covid-19.
Uyu Mukuru w’Igihugu yabitangaje kuri uyu wa 28 Nyakanga 2021, ubwo yari amaze guterwa urukingo rw’iki cyorezo ku nshuro ya mbere.
Ni icyemezo yafashe mu gihe uwo yasimbuye ku butegetsi, Dr John Pombe Magufuli we yari yaravuze ko igihugu cye kitazafata izi nkingo zituruka mu mahanga, kuko atari azizeye.
Mu ijambo risa n’irivuguruza irya Dr Magufuli, Perezida Samia yagaragaje ko igihugu cye gikwiye kugendera mu mujyo ibindi birimo, nacyo kigakingira abaturage bacyo cyifashishije izi nkingo.
Nk’uko BBC yabitangaje, Perezida Samia yagize ati: “Ntabwo turi ikirwa, ni yo mpamvu twatangiye gahunda yo gukingira.”
Yakanguriye abaturage kwikingiza, kuko nta ngaruka yabyo. Yagize ati: “Kuva navuka nahawe inkingo kenshi, izo bahaye impinja zazihaye uburinzi bw’igihe kirekire. Rero nta mpungenge mfite.”
Inkingo Tanzania iri gukoresha ni ubwoko bwa Johnson & Johnson yahawe na Leta Zunze Ubumwe za Amerika tariki ya 24 Nyakanga 2021. Ni ubwa mbere iki gihugu cyari cyakiriye inkingo za Covid-19.
