Perezida w’u Bufaransa, Emmanuel Macron yareze Flori Michel-Ange wamamaye mu gukora ibyapa (billboards), amushinja kumugereranya n’umunyagitugu w’Umudage, Adolf Hitler wigeze guhungabanya Isi.
Iki kirego Perezida Macron yagitanze kuri sitasiyo ya Polisi ya Toulon nyuma y’aho Flori ashyize ku mugaragaro icyapa kigaragaza uyu Mukuru w’Igihugu ateye neza nka Hitler.
Iki cyapa dukesha Le Figaro kigaragaza Perezida Macron yambaye impuzankano y’ishyaka ry’Abanazi Hitler yambaraga, afite ubwanwa bwo hejuru bukeya n’umusatsi nk’uw’uyu munyagitugu, ku ruhande handitse amagambo agira ati: “Ubaha wikingize.”
Radiyo mpuzamahanga y’Abafaransa, RFI ivuga ko Flori yakoze iki cyapa mu rwego rwo kwamagana amabwiriza Perezida Macron yashyizeho yo gukumira ikwirakwira ry’icyorezo cya Covid-19, nko kwikingiza.
Ubushinjacyaha bwa Toulon bwatangiye iperereza kuri iki cyaha Flori ashinjwa tariki ya 27 Nyakanga 2021.
