Perezida wa Repubulika y’u Burundi, Evariste Ndayishimiye yavuze ko hari umunyamakuru ukomoka mu gihugu cye ukorera Radiyo Mpuzamahanga y’Abafaransa, RFI, urimo kwiyahura kubera ko kitugarijwe n’icyorezo cya Covid-19.
Iri ni ijambo uyu Mukuru w’Igihugu yatangaje ubwo yari ayoboye umuhango wo gusezera ku Barundi baba mu mahanga bari basuye u Burundi, wabereye i Bujumbura ku wa 20 Kanama 2021.
Uyu munyamakuru Perezida Ndayishimiye atavuze izina, yemeza ko u Burundi bwugarijwe na Covid-19 mu buryo budasanzwe, nyamara abayobozi bo muri iki gihugu bemeza ko ubwandu bwayo mu gihugu ari buke.
Perezida Ndayishimiye yibasiye uyu munyamakuru ati: “Hari Umurundi ubabajwe n’uko Covid-19 itaratwugariza, muhora mumwumva ku maradiyo! Avugira kuri RFI ababaye ngira ngo arimo kwiyahura kubera ko Covid-19 itarugariza Abarundi.”
Uyu Mukuru w’Igihugu yavuze ko uyu munyamakuru ari we wenyine usigaye yifuza ko Abarundi bagwa mu manga, bamarana, bapfa, ngo si we uzarota Covid-19 igeze neza mu gihugu ngo ibazahaze. Gusa ngo ntacyo bazaba, “Imana irahari.”
