Perezida wa Repubulika ya Demukarasi ya Congo, Félix Tshisekedi yemeye kuvuza umunyeshuri witwa Abigail Katungu wahohotewe n’abashinzwe umutekano ubwo we na bagenzi be bari mu myigaragambyo yamaganaga ubugizi bwa nabi bw’imitwe yitwaje intwaro muri Teritwari ya Beni mu Ntara ya Kivu y’Amajyaruguru.
Nk’uko Ibiro by’Umukuru w’Igihugu bibivuga, ubwo aba banyeshuri bari mu myigaragambyo y’amahoro, abashinzwe umutekano bagerageje kubasubiza inyuma. Icyo gihe byaje kumenyekana ko bakoresheje ibyuka biryana mu maso n’amasasu.
Muri uku kubasubiza inyuma, uyu mukobwa wiga amasomo y’ubuhinzi mu mwaka wa gatanu w’amashuri yisumbuye, yahavunikiye ukuboko kw’iburyo, ajyanwa kuvurirwa mu bitaro biherereye mu Ntara ya Kivu y’Amajyarugu.
Ubwo Perezida Tshisekedi yageraga muri Beni tariki ya 15 Kamena 2021, yasuye aba banyeshuri, bamumenyesha ko ubwo bari mu myigaragambyo bakorewe urugomo n’abashinzwe umutekano, abasaba imbabazi “abikuye ku mutima”.
Icyo gihe yahuye na Abigail Katungu ufite ukuboko kose kukiriho sima, amubwira uko yakorewe urugomo. Umukuru w’Igihugu yahise asaba abayobozi gushakisha abandi banyeshuri bahohotewe, cyane cyane abakeneye ubuvuzi kugira ngo Leta ibavuze, ababahohoteye nabo bakabihanirwa.
Kuri uyu wa 22 Kamena 2021 ni bwo Ibiro by’Umukuru w’Igihugu byasohoye itangazo rivuga Perezida Tshisekedi yasabye ko uyu munyeshuri ajyanwa kuvurirwa mu bitaro byo mu murwa mukuru, Kinshasa.
Aba banyeshuri bakoze iyi myigaragambyo muri Mata 2021, bamara iminsi 8 barara hanze. Icyo gihe bavugaga ko bazava muri iyi myigaragambyo ari uko Perezida Tshisekedi ahabasanze, agashakira Beni n’ibindi bice by’uburasirazuba bw’igihugu umuti urambye ku kibazo cy’umutekano muke.
Ubwo yabasuraga, yabasezeranyije ko nk’uko babimusabye, ashaka gushyira ku iherezo iki kibazo cy’umutekano muke.
Kurikira ibiganiro n’amavidewo binyura kuri Bwiza TV
