Bodi ya Maendeleo ya Rwanda (RDB) imeanzisha uchunguzi kuhusu malalamiko ya wateja waliodai kutoridhishwa na huduma walizopata katika hoteli ya Château Le Marara, iliyoko kando ya Ziwa Kivu katika wilaya ya Karongi.
Malalamiko hayo yalijitokeza baada ya harusi kufanyika hotelini hapo siku ya Jumatatu, tarehe 14 Julai 2025.
Wageni waliokuwepo walilalamika kwamba hoteli iliwadharau, haikutoa huduma bora, na haikuonyesha uweledi kama taasisi ya mapokezi ya wageni.
Wengine walieleza kuwa walipewa ahadi ya huduma za kiwango cha juu, lakini walipofika mambo yalikuwa tofauti.
Mmoja aliandika kwenye mtandao wa X:
“Ni huzuni kuona biashara inakataa kuwajibika kwa makosa yake baada ya kulipwa pesa zote mapema, huku ikiahidi huduma za hali ya juu ambazo hazikutekelezwa.”
Wateja hao walieleza kuwa walilazimika kutafuta jenereta yao wenyewe, kwani hoteli haikuweza kutoa umeme wa kutosha. Walipojaribu kuwasilisha malalamiko kuhusu chakula na huduma, uongozi wa hoteli uliwapuuza au kuwarejesha kwa watu wasio na msaada.
Wakati RDB ikithibitisha kuwa inakusanya taarifa zote ili kubaini ukweli, uongozi wa Château Le Marara uliwasilisha malalamiko kwa Ofisi ya Upelelezi ya Rwanda (RIB), ukidai kuwa baadhi ya walalamikaji hawakulipa huduma walizotumia.
Jean-Guy Afrika, Mkurugenzi Mkuu wa RDB, aliambia gazeti la The New Times kuwa:
“Uamuzi wowote utakaofanywa utazingatia sheria na kanuni za utalii nchini Rwanda.”
Meya wa Karongi, Bwana Gérald Muzungu, alisema wanangoja ripoti ya uchunguzi huo lakini akaongeza kuwa tatizo hilo limepewa kipaumbele cha juu.
