Laurent Monsengwo Pasipanya, umwe muri ba Karidinali Repubulika ya Demukarasi ya Congo (RDC) yari ifite, yitabye Imana kuri uyu wa 11 Nyakanga 2021 azize uburwayi.
Inkuru y’urupfu rwe yemejwe n’abarimo Karidinali Fridolin Ambongo, wanyujije ku rubuga rwa Twitter ati: “Mbabajwe no kumenyesha umuryango w’abakirisitu gatolika n’inshuti zose inkuru y’urupfu rwa Karidinali Laurent Monsengwo.”
Karidinali Ambongo yatangaje ko Monsengwo w’imyaka 81 y’amavuko yapfiriye mu mujyi wa Versailles mu Bufaransa.
Karidinali Monsengwo yajyanwe kuvurirwa mu Bufaransa mu ijoro ryo ku wa Mbere rishyira uwa Kabiri, arembye.
Yari yarahawe ikamba rya Karidinali mu Gushyingo 2010 na Papa Benedigito XVI wari Umushumba Mukuru wa Kiliziya Gatolika ku Isi. Yabaga mu mujyi wa Kinshasa, mu kiruhuko cy’izabukuru.
