Icyumweru gishize cyatangiye tariki ya 26 Nyakanga 2021 cyaranzwe n’inkuru nyamukuru zirimo izerekeye: ubuzima, umutekano, politiki n’imyidagaduro.
Zimwe muri zo ni izikurikira:
U Rwanda rwashyikirije u Burundi abarwanyi ba RED-Tabara
Igisirikare cy’u Rwanda tariki ya 30 Nyakanga 2021 cyashyikirije icy’u Burundi abarwanyi 19 b’umutwe wa RED-Tabara cyafatiye mu ishyamba rya Nyungwe muri Nzeri 2020.
Uyu muhango wabereye ku mupaka wa Gasenyi-Nemba uhuza ibihugu byombi, mu Karere ka Bugesera ku ruhande rw’u Rwanda, uyobowe n’umuyobozi w’urwego rw’ubutasi rwa gisirikare, Brig. Gen. Vincent Nyakarundi na Col. Ernest Musaba ku ruhande rw’u Burundi.
Mu nama yahurije abakuru b’ibihugu bigize umuryango CEAC ugizwe n’ibihugu birimo muri karere ka Afurika yo hagati, Perezida w’u Burundi, Evariste Ndayishimiye yashimiye u Rwanda ku bw’iki gikorwa, aboneraho kurusaba ko rwatanga n’abaruhungiyeho bagerageje guhirika ubutegetsi bwa Pierre Nkurunziza.
Umusirikare w’u Rwanda yakomerekeye mu mirwano n’inyeshyamba muri Mozambique
Umuvugizi w’ingabo z’u Rwanda, Col. Ronald Rwivanga tariki ya 29 Nyakanga 2021 yabwiye itangazamakuru ko umusirikare umwe w’u Rwanda uri mu butumwa bw’amahoro mu ntara ya Cabo Delgado muri Mozambique, yakomerekeye mu mirwano n’abarwanyi b’umutwe w’iterabwoba wegamiye kuri Isilamu.
Yavuze ko iyi mirwano yabaye tariki ya 26 Nyakanga 2021, ubwo aba barwanyi bari bagabye igitero mu gace ka Awasse karimo ibirindiro by’ingabo z’u Rwanda.
Uyu musirikare yakomeretse ubwo we na bagenzi be basubizaga inyuma aba barwanyi, ajyanwa kwa muganga.
Ibitaramo by’abaturutse mu Rwanda byaburijwemo mu Burundi
Minisiteri y’ubutegetsi, iterambere ry’abaturage n’umutekano mu Burundi tariki ya 29 Nyakanga 2021 yatangaje ko nta muntu izemerera ko ajya gutaramirayo aturutse mu Rwanda, bitewe n’ubukana bw’icyorezo cya Covid-19 muri iki gihugu.
Abahanzi bagizweho ingaruka n’iki cyemezo ni Israel Mbonyi, Bruce Melodie n’umunyarwenya Ndimbati wamamariye mu rwenya rwitwa Papa Sava, bose bari bafite gahunda yo gutaramira Abarundi muri uku kwezi kwa Kanama 2021.
Guverinoma y’u Burundi usibye gukumira abahanzi baturutse mu Rwanda, yanatangaje ko mu rwego rwo kwirinda ikwirakwira rya Covid-19, nta gitaramo kizabera mu gihugu muri uku kwezi.
Hashyizweho abavugizi bashya muri Guverinoma na Perezidansi
Guverinoma y’u Rwanda tariki ya 30 Ukuboza 2021 yashyizeho Umuvugizi wayo muri Minisiteri y’Ububanyi n’Amahanga n’ubutwererane, n’uw’ibiro by’Umukuru w’Igihugu (Perezidansi).
Umuvugizi mushya wa Guverinoma yagizwe Yolande Makolo, naho uwa Perezidansi ni Stephanie Nyombayire.
Guma mu Rugo yakuweho, ingendo zihuza intara zirasubukurwa
Guverinoma y’u Rwanda tariki ya 30 Nyakanga 2021 yafashe icyemezo cyo gukura gahunda ya Guma mu Rugo mu turere tugize umujyi wa Kigali n’utundi 8 tumaze igihe twibasiwe n’icyorezo cya Covid-19.
Mu byemezo yafashe kandi, harimo gufungura ingendo zihuza intara n’umujyi wa Kigali, yemerera imodoka zitwara abagenzi mu buryo bwa rusange kongera gukora, ariko zigatwara 50% by’ubushobozi bwazo.
Moto n’amagari byari byaragizweho ingaruka n’amabwiriza ya Guma mu Rugo nabyo byemerewe kongera gukora.
