Urukiko rukuru, urugereko ruburanisha ibyaha mpuzamahanga n’ibyambukiranya imipaka rwatangaje ko isomwa ry’urubanza rwa Paul Rusesabagina, Nsabimana Callixte (Major Sankara) n’abandi bareganwa ibyaha by’iterabwoba ritazaba tariki ya 20 Kanama 2021 nk’uko byari biteganyijwe.
Urwego rw’Ubucamanza rw’u Rwanda rwabitangarije ku rubuga rwa Twitter kuri uyu wa 18 Kanama 2021 ruti: “Urukiko rukuru, urugereko ruburanisha ibyaha mpuzamahanga n’ibyambukiranya imipaka rurabamenyesha ko isomwa ry’urubanza rwa Bwana Rusesabagina n’abo bareganwa ntabwo rikibaye kuri uyu wa Gatanu nk’uko byari biteganyijwe.”
Ntabwo uru rwego rwigeze rutangaza impamvu y’isubikwa ry’isomwa ry’uru rubanza, gusa amakuru agera kuri Bwiza avuga ko byatewe n’uko uru rukiko rutararangiza kwandika uru rubanza bitewe n’ubunini bwa dosiye .
Ubucamanza buvuga ku wa 20 Kanama ari bwo igihe isomwa ry’uru rubanza ryimuriweho kizamenyekana. Buti: “Indi tariki izamenyeshwa ababuranyi kuri uyu wa Gatanu tariki ya 20 Kanama 2021.”
Uru rukiko rwapfundikiye iburanisha ry’urubanza rwa Rusesabagina, Sankara n’abo bareganwa tariki ya 22 Nyakanga 2021.
