Umutwe w’Abadepite mu Nteko Ishinga Amategeko y’u Rwanda watangaje ko Komisiyo y’Imibereho y’Abaturage yasesenguye ibikorwa bya Komisiyo y’Igihugu ishinzwe abakozi ba Leta mu mwaka w’2018/2019, isanga Ikigo cy’Igihugu gishinzwe amazi, isuku n’isukura (WASAC) cyarahombeje Leta amafaranga arenga miliyoni 49, mu gihe Akarere ka Musanze ko kayihombeje ibihumbi 20.
Bigaragara ku mugereka w’ibaruwa yo ku wa 26 Mutarama 2021 Perezida w’Umutwe w’Abadepite, Mukabarisa Donatille yandikiye Minisitiri w’Intebe, amusaba kumutumirira bamwe mu bayoboye za Minisiteri, ibigo/inzego, Umuyobozi w’Umujyi wa Kigali n’abayobozi ba tumwe mu turere tw’igihugu, mu nama z’iyi komisiyo zateganyijwe hagati ya tariki ya 2 n’8 Gashyantare 2021.
Kuri uyu mugereka, Mukabarisa avuga ko isesengura ryakozwe mu 2018/2019, rigaragaza ko hari inzego zateje Leta ibihombo, zibimburiwe na WASAC yayihombeje menshi; Musanze ikaza ku mwanya wa mbere mu zayihombeje make.
Ibi bihombo bishingiye ku manza Leta yatsinzwe zijyanye n’imicungire y’abakozi; aho hari abayobozi bafatiye ibyemezo abakozi mu buryo budakurikije amategeko, hanyuma bagahindukira barega Leta.
Uko inzego zahombeje Leta mu 2018/2019
- WASAC yahombeje Leta 49,150,000 RWF.
- Ikigo cy’Igihugu gishinzwe ingufu (REG) cyahombeje Leta 46,885,000 FRW.
- Minisiteri y’Ubucuruzi n’Inganda (MINICOM) yahombeje Leta 30,145,000 RWF.
- Kaminuza y’u Rwanda (UR) yahombeje Leta 26,811,575 RWF.
- Akarere ka Nyarugenge kahombeje Leta 11,609,450 RWF.
- Ikigo cy’Igihugu gishinzwe iterambere ry’ubwikorezi (RTDA) cyahombeje Leta 8,090,528 RWF.
- Akarere ka Nyagatare kahombeje Leta 4,745,448 RWF.
- Ikigo cy’Igihugu gishinzwe imisoro n’amahoro (RRA) cyahombeje Leta 1,700,000 RWF
- Akarere ka Gatsibo kahombeje Leta 1,596,156 RWF.
- Akerere ka Karongi kahombeje Leta 1,430,000 RWF.
- Urwego rw’Igihugu rushinzwe imfungwa n’abagororwa (RCS) rwahombeje Leta 1,250,000 RWF.
- Akarere ka Gicumbi kahombeje Leta 937,075 RWF.
- Ikigo cy’Igihugu gishinzwe imyuga n’ubumenyingiro (WDA) cyahombeje Leta 650,000 RWF.
- Minisiteri y’Ubuzima (MINISANTE) yahombeje Leta 575,000 RWF.
- Umujyi wa Kigali wahombeje Leta 450,000 RWF.
- Akarere ka Musanze kahombeje Leta 20,000 RWF.
