400 bakingiwe bagaragayeho Covid-19, abakenera ibitanda biyongereyeho 175%_RBC

Dr Nsanzimana yabitangarije mu kiganiro iki kigo na Minisiteri y’Ubuzima byagiranye n’itangazamakuru kuri uyu wa 16 Kamena 2021 cyibandaga ku ngamba nshya Guverinoma yitegura gufata bitewe n’ubwiyongere bukabije bw’ubwandu bwa Covid-19.

Umunyamabanga wa Leta muri Minisiteri y’Ubuzim, Dr Mpunga Tharcisse wari muri iki kiganiro, yavuze ko kwirara kwa bamwe kuri mu mpamvu zatumye iki cyorezo cyongera gukaza umurego mu gihugu.

Yagize ati: “Kwiyongera k’ubwandu bushya bwa Covid-19 muri iyi minsi biraterwa n’abantu batangiye kwirara bumva ko icyorezo cyarangiye kandi si ko biri. Covid-19 iracyahari kandi abantu ntibagomba kudohoka.”

Dr Mpunga yavuze ko mu bantu birayi harimo abamaze gukingirwa iki cyorezo, gusa abibutsa ko hari ibyago by’uko uwakingiwe na we yakwandura nk’uko byagenze kuri bamwe. Ati: “Hari abantu kandi bumva ko bamaze gukingirwa Covid-19 batagomba kubahiriza amabwiriza yo kwirinda, bamwe bakumva ko batanakwandura. Ibi sibyo kuko mu bwandu bushya bugaragara harimo n’abantu bakingiwe.”

Mu banduye barakingiwe nk’uko Dr Nsanzimana yabitangaje, harimo 400. Yagize ati: “Mu bipimo tumaze iminsi dufata, hagaragaye abantu 400 banduye kandi baramaze gukingirwa. Abakingiwe ntibagomba kwirara bumva ko gukingirwa bikuraho kwandura cyangwa kwanduza abandi.”

Yakomeje ati: “Muri aba 400, hari abakingiwe urukingo 1, abandi ebyiri. Nta warembye cyangwa ngo ahitanwe na Covid-19. Ariko bashobora kwanduza udakingiye we akaba yamererwa nabi.”

Dr Nsanzimana yavuze ko ugereranyije n’icyumweru gishize, muri iki cyumweru abanduye biyongereye ku kigero cya 275%. Ati: “Mu cyumweru gishize twari dufite abarwayi 300, muri iki cyumweru gikurikiye dufite 1200. Abarwayi ba Covid-19 biyongereyeho inshuro 275%. Imfu ziturutse kuri Covid-19 nazo zazamutseho 25%.”

Yavuze ko kandi n’abandura bagakenera ibitanda biyongereye kugera ku kigero cy’175% ku buryo ibitanda byariho ubusa ubu hari ababirwariyeho. Ati: “Ibitanda twari dufite bitariho abarwayi ubu ngubu byagiyeho abarwayi ku buryo ijanisha ry’abajya kwa muganga bagakenera igitanda naryo ryageze ku 175% by’inyongera.”

Minisiteri y’Ubuzima na RBC bigaragaza ko kuva iki cyorezo cyagera mu Rwanda muri Werurwe 2020, abamaze kucyandura ari 29,175, abagikize ni 26,383. Abashya banduye kuri uyu wa 16 Kamena 2021 ni 263, nta n’umwe wakize. Abakirwaye ni 2416, abarebye bo ni 11.

Kurikira ibiganiro n’amavidewo binyura kuri Bwiza TV