Ikipe ya Juventus ifite rutahizamu Cristiano Ronaldo, igiye gucakirana na Manchester United mu mikino y’amakipe yabaye aya mbere iwayo (Champions League). Ni umukino utegerejwe na benshi kuko uyu musore azaba akina n’ikipe yagiriyemo ibihe byiza.
Ni umukino uteganyijwe mu kwezi gutaha, ku wa 23 Ukwakira 2018, ku kibuga cya Man Utd (Old Trafford) umukino wo kwishyura ube kuri 7 Ugushyingo 2018.
Ronaldo agomba gusiba umukino umwe w’iyi shampiyona nyuma yaho aherewe ikarita itukura ubwo yapfuraga umusatsi wa myugariro w’ikipe ya Valencia, ikipe yatsinzwe bibiri ku busa ubwo bakinaga. Umukino uzahuza Juventus na Young Boys yo mu Busuwisi, ku wa 2 Ukwakira akaba atazawugaragaramo.
Nk’uko BBC Sports ibitangaza, ngo uyu niwo mukino wa mbere wa Champions League, Ronaldo aherwemo ikarita itukura kuva yatangira ruhago.
Ronaldo umaze gukoza imitwe y’itoki ku gikombe cya Champions League inshuro eshanu yinjiye mu ikipe ya Juventus aguzwe muri Real Madrid Miliyoni 100 z’Amayero.
Ronaldo w’imyaka 33 y’amavuko yinjiye mu ikipe ya Man. Utd mu 2003 ubwo yari avuye mu ikipe ya Sporting Club yo muri Portugal, i Old Trafford uyu musore yahagiriye ibihe byiza byamuhesheje amahirwe yo kwerekeza muri Real Madrid mu mwaka wa 2009.
