Ubushinjacyaha bw’u Burundi buravuga ko bwafashe umwe mu bantu bagize uruhare muri video ya BBC yashinje Igipolisi cy’u Burundi iyicarubozo n’ubwicanyi.
Mu kiganiro n’itangazamakuru, Umushinjacyaha Mukuru w’u Burundi, Sylvestre Nyandwi, yavuze ko bafashe umwe mu bagize uruhare muri video ya BBC kuri iki gihugu kivuga ko irimo ibinyoma.
Yagize ati: “Patrick Mugwaneza aravuga ibiri muri iyo video akanavuga ukuntu yateguwe, akanavuga n’abo bayikoranye kimwe n’ababafashije.”
Yakomeje avuga ko uwo wafashwe yemeza uruhare rw’umuyobozi b’amashyirahamwe yigenga ushakishwa n’ubutabera bw’u Burundi, ari we Pacifique Nininahazwe.
Uyu ngo akaba ari we wahuje abanyamakuru ba BBC n’abagize uruhare muri iyi video barimo Mugwaneza Patrick.
Ni video yagiye ahagaragara ku itariki 04 Ukuboza mu 2018, yerekana inyubako iri mu mujyi wa Bujumbura bivugwa ko yakorewemo ibikorwa by’iyicarubozo n’ubwicanyi.
Ikimara kujya hanze, Leta y’u Burundi yahise iyamagana ihamagaza abahagarariye ibihugu byabo mu Burundi ibajyana kuri iyo nyubako kugirango birebere ukuri kw’ibivugwa muri iyo video.
Iyi nkuru ikibutsa ko BBC isanzwe yarakuwe ku murongo wa FM mu Burundi kuva mu mpera z’ukwezi kwa kane mu mwaka ushize nyuma y’ikindi kiganiro cyakozwe n’igice cyayo cy’Igifaransa.
Icyo gihe BBC yahagarikanwe n’ikindi kinyamakuru mpuzamahanha mu gihe cy’amezi atandatu ariko kugeza ubu ntibirakomorerwa.
