Umwe mu rubyiruko rw’Imbonerakure rw’ishyaka CNDD FDD, riri ku butegetsi, yatewe icyuma arakomereka bikomeye ubwo hamwe na bagenzi be bari bagabye igitero ku rugo rw’umuturage.
Imbonerakure yitwa Ido Munezero, yatewe icyuma mu ijoro ryo ku wa Kabiri rishyira iryo ku wa Gatatu tariki ya 13 Gashyantare 2019, mu gace ka Nyamugari, mu Mujyi wa Gitega, mu Burundi.
Nk’uko SOS/ Burundi ibitangaza, ngo iyi Mbonerakure yari kumwe na bagenzi bayo, bafite intwaro bagabye igitero mu rugo rw’umuturage utatangajwe amazina, mu kwirwanaho atera icyuma umwe muri zo.
Umwe mu bahaturiye yagize ati “Ryari itsinda ry’Imbonerakure zifite intwaro z’ubuhiri, zigaba igitero mu rugo rw’umuturage utuye muri ako gace, mu kwitabara yakoresheje icyuma akomeretsa umwe ubwo bari bamaze kubomora urugi rw’umuryango w’inzu ye”.
Umuyobozi muri aka gace, Majaliwa Ndayisaba, avuga ko Munezero watewe icyuma yajyanwe kuvurirwa ku bitaro bikuru bya Gitega mu gihe umuturage wamuteye icyuma afungiye mu kasho ya polisi i Gitega, hanakorwa iperereza.
