Inzobere z’Agashami ka Loni Gashinzwe Uburenganzira bwa Muntu, nyuma yo gukora iperereza ku bibera i Burundi, zitangaza ko ibyo zasanzwe bihakorerwa ari bibi cyane, aho uburengenzira bwa bamwe buhutazwa, muri iki gihe bitegura amatora y’umukuru w’igihugu.
Ku wa Kabiri tariki ya 2 Nyakanga 2019, i Geneve, imbere y’aka gashami gashinzwe uburenganzira bwa muntu, Doudou Diène wari uyoboye izi nzobere zakoze iperereza, yavuze ko hari abarundi batashywe n’ubwoba baterwa n’uko isaha ku isaha bahora biteguye guhura n’isanganya.
Avuga ko n’ubwo u Burundi butari mu gihe cy’intambara, ko umwuka uri mu gihugu uteye amakenga.
Izi nzobere zitangaza ko kuva muri Gicurasi 2018, u Burundi burangwa no kutubahiriza uburenganzira bw’ikiremwamuntu, aho hari abicwa, abashimutwa, abafungwa mu buryo bunyuranyije n’amategeko, iyicwarubozo,…
Aba bakoze iperereza bavuga ko abakorerwa ibi, ari abatavuga rumwe n’ubutegetsi n’imiryango yabo cyangwa se abanze kwinjira mu ishyaka CNDD-FDD, cyangwa se mu rubyiruko rw’Imbonerakure.
Bwana Diène amenyesha ko abantu bategekwa gutanga intwererano zirenze, harimo izo gutegura amatora ya 2020, mu gihe bazahajwe n’ubukene.
Mu gihe u Burundi bwitegura amatora yo mu 2020, aka gashami ka Loni gasaba ko amahanga yakomeza kubuhozaho ijisho by’umwihariko ko nta matora ya nyayo babona azakorwa mu gihe ishyaka riri ku butegetsi ryigaruriye urubuga ndetse ryiyitirira n’inzego z’igihugu.
BBC itangaza ko Ambasaderi Rénovat Tabu uhagarariye u Burundi muri Loni, avuga ko iki cyegeranyo kigamije kurwanya Leta y’u Burundi, ndetse ko ibikubiyemo ari ibinyoma.
Ati “ Ako gashami kaguye mu mutego w’abanyapolitike”.
Amb. Rénovat Tabu ahakanye ibivugwa ku Burundi mu gihe mu minsi iheze ishyaka CNL rya Agathon Rwasa ritavuga rumwe na Leta y’u Burundi, watangaje ko abarwanashyaka bawo bahohoterwa, bakorerwa amabi ku buryo butandukanye.
