Perezida Donald Trump, yatangaje ko ubwato bw’intambara bwa Leta Zunze Ubumwe za Amerika bwasenye indege yo mu bwoko bwa drone ya Irani, avuga ko yari ibangamiye ubwo bwato ndetse n’abari baburimo mu Kigobe cya Hormuz kuri uyu wa Kane, itariki 18 Nyakanga.
Perezida Trump yabwiye abanyamakuru ko iyo drone yirengangije gasopo yahawe yo kutegera ubwo bwato bw’intambara bwa Leta Zunze Ubumwe za Amerika.
Minisitiri w’ububanyi n’amahanga wa Iran, Mohammad Jayad Zarif yatangarije I New York ko nta makuru afite y’uko hari drone y’igihugu cye yahanuwe nk’uko iyi nkuru dukesha Ijwi rya Amerika ivuga
Ku ruhande rwe ariko, Perezida Donald Trump yasabye amahanga kwamagana icyo yise kugerageza guhungabanya umutekano n’ubucuruzi mpuzamahanga mu mazi kwa Irani.
Iraswa ry’iyi drone kuri uyu wa Kane, ngo rikaba rishobora gukomeza kuzamura umwuka mubi hagati ya Leta Zunze Ubumwe za Amerika na Irani, ibihugu bisanzwe bidacana uwaka, aho ngo igihugu cya Irani cyasubiye inyuma mu bukungu kubera ibihano by’ubukungu yafatiwe na Amerika.
