Mu ijoro ryo ku Cyumweru tariki ya 18 Kanama 2019, abarwanyi b’ishyaka CNL rya Agathon Rwasa, umunyapolitiki utavuga rumwe na Leta iriho ariko akaba ari Visi Perezida w’Inteko Nshingamategeko, batezwe mu ijoro bataha, umwe muri bo aricwa, batandatu barakomeretswa.
Umuvugizi w’iri shyaka mu Ntara ya Muyinga ubu bwicanyi bwabereyemo, Terence Manirambona, avuga ko baguye mu gico cy’abagizi ba nabi, ubwo batahaga ari nijoro bavuye mu birori byo gufungura ibiro by’iri shyaka mu murwa mukuru w’iyi Ntara.
Akomeza avuga ko bitumvikana uburyo aba bayoboke b’iri shyaka bahohotewe kugera n’aho umwe yicwa abandi bagakomeretswa, mu gihe aho byabereye ngo hasanzwe hahora abashinzwe umutekano, hari na komite z’abarinda umutekano nijoro.
Manirambona avuga ko ababagabyeho igitero, bari bitwaje imihoro, impiri n’amacupa, maze ngo barabatemagura, bicamo uwitwa Nsavyumwami Gregoire. Ashimangira ko nta butabazi bwihuse bwabayeho ngo kuko abashinzwe umutekano bahageze bakerewe.
Nk’uko Agathon Rwasa aherutse kubitangariza ibitangazamakuru bitandukanye mpuzamahanga, yavuze ko abayoboke b’ishyaka CNL ritavuga rumwe na Leta y’u Burundi bahohoterwa mu buryo butandukanye, aho bamwe ngo bafungwa mu buryo bunyuranyije n’amategeko, gushyirwa ku iterabwoba, gukubitwa, kwica,…
