Baada ya serikali ya DRC na muungano wa AFC/M23 kufikia makubaliano ya kusitisha mapigano katika mazungumzo ya Doha, yaliyolenga kutatua chanzo halisi cha mzozo mashariki mwa DRC, Waziri wa Mambo ya Nje wa Ubelgiji, Maxime Prevot, ametangaza kwamba atatembelea ukanda wa Maziwa Makuu wiki hii.
Tangazo hilo lilitolewa Alhamisi, tarehe 24 Aprili 2025, kupitia ukurasa wake rasmi wa X (zamani Twitter), ambapo alisifu hatua zilizopigwa Doha.
“Ninapongeza makubaliano kati ya DRC na M23/AFC kuhusu jitihada za amani na usitishaji wa mapigano, jambo linaloweka msingi wa amani ya kudumu mashariki mwa Congo,” alisema Prevot.
“Hii ni hatua muhimu ya kukomesha ghasia.”
Waziri Prevot, ambaye aliwahi kuzozana na Rwanda, hasa baada ya Ubelgiji kupendekeza vikwazo dhidi ya Rwanda bila kutambua sababu za msingi za mzozo wa Congo, alisema atawasili tena katika ukanda huu Ijumaa, tarehe 25 Aprili 2025.
“Kuanzia Ijumaa hii, nitazuru ukanda huu ili kuonyesha uungwaji mkono kamili kwa juhudi zinazoongozwa na Qatar na mashirika ya kikanda kama vile EAC na SADC,” aliongeza.
Hii inaleta maswali: Ni nini hasa kinamleta Waziri wa Mambo ya Nje wa Ubelgiji katika ukanda huu wakati huu?
Haswa ikizingatiwa kuwa Ubelgiji imekuwa ikituhumiwa kushauri serikali ya Congo kutofanya mazungumzo na M23 tangu mapigano yalipoanza upya.
