Marekani imetangaza kuwa siku ya Ijumaa tarehe 25 Aprili, makubaliano yamesainiwa kati ya Rwanda na Jamhuri ya Kidemokrasia ya Kongo.
Makubaliano haya yamesainiwa kati ya Waziri wa Mambo ya Nje wa Rwanda, Balozi Olivier Nduhungirehe, na mwenzake wa Kongo, Thérèse Wagner Kayikwamba.
Wizara ya Mambo ya Nje ya Marekani ilitangaza kuwa mawaziri hao wawili watapokelewa na Waziri wa Mambo ya Nje wa Marekani, Marco Rubio.
Hakuna taarifa kamili zilizotolewa kuhusu maudhui ya makubaliano haya kati ya Rwanda na Kongo.
Hata hivyo, makubaliano hayo yamekuja baada ya Washington kutuma wajumbe wake Kigali na Kinshasa.
Mmoja wao ni Massad Boulos, mshauri wa Rais Donald Trump kuhusu masuala ya Afrika. Mwezi huu alipokelewa na Marais Paul Kagame na Félix Antoine Tshisekedi katika miji hiyo miwili.
Alipokuwa Kigali, Boulos aliiambia vyombo vya habari kuwa Trump anaunga mkono kurejeshwa kwa amani kati ya Rwanda na Kongo.
Nchi hizi mbili zimekuwa na mvutano kwa muda mrefu kutokana na mapigano yanayoendelea mashariki mwa DRC, ambapo jeshi la Kongo linapambana na kundi la M23.
Kinshasa na nchi kama Marekani zinaituhumu Rwanda kwa kusaidia kundi hilo. Katika mahojiano mengine, Boulos aliitaka Rwanda “kusitisha msaada kwa M23 na kuondoa wanajeshi wake wote kutoka ardhi ya Kongo.”
Mshauri huyo wa Trump pia alisisitiza kuwa kundi la kigaidi la FDLR ni tatizo kubwa ambalo linapaswa kushughulikiwa katika mazungumzo kati ya Rwanda na Kongo. Alizungumzia suala hilo na Rais Paul Kagame.
Akasema: “Tulijadili kuhusu FDLR na matatizo wanayoweza kusababisha. Hili ni jambo muhimu katika makubaliano ya amani. Ni muhimu kwa upande wa Rwanda na ni sehemu muhimu ya mpango wa amani.”
Mwaka jana, wakati wa mazungumzo ya Luanda, Rwanda na DRC walikubaliana kulivunja kundi la FDLR, lakini haikutekelezwa.
Boulos alieleza kuwa Marekani inaunga mkono uamuzi huo na itaendelea kushirikiana na pande zote kuhakikisha FDLR inavunjwa. Alisisitiza kuwa nchi yake inaunga mkono uhuru na mamlaka kamili ya Rwanda na Kongo.
Akasema: “Kama nilivyosema nilipokuwa Kigali, tunachotaka ni kuheshimiwa kwa uhuru na mipaka ya kila taifa, si taifa moja tu.”
Akaongeza: “Kila mtu anapaswa kujisikia salama kwa misingi ya kanuni hizo na asiwe na hofu kutokana na migogoro ya sasa au ya baadaye.”
