Katika mahojiano na gazeti la The Telegraph la Uingereza, Corneille Nangaa, kiongozi wa muungano wa AFC/M23, ametangaza kuwa vuguvugu hilo litaendelea na mapambano licha ya kutiwa saini kwa tamko la makubaliano kati ya Jamhuri ya Kidemokrasia ya Kongo (DRC) na Rwanda huko Washington — hadi Rais Félix Tshisekedi aondoke madarakani, kwa kujiuzulu au kuondolewa.
“Tunapaswa kuheshimu matakwa ya wananchi wa Kongo,” alisema Nangaa. “Wakongo hawataki tena kusikia neno ‘kusitisha vita’, si kwa sababu wanapenda vita, bali kwa sababu hawataki tena Félix Tshisekedi aendelee kuwa madarakani.”
Akaongeza kuwa serikali ya Tshisekedi huepuka maneno fulani katika mazungumzo.
“Hawapendi kabisa kusikia kuhusu ‘mazungumzo’. Hawataki mtu yeyote kuzungumza kuhusu kuondoka kwenye miji hii, iwe kutoka upande wao au wetu,” alisema.
Katika mahojiano hayo, Nangaa ambaye alibadilisha mavazi yake ya kijeshi na kuvaa koti la kiraia, alimfananisha Tshisekedi na nabii Yona katika Biblia, akisema kuwa kama ilivyokuwa kwa Yona aliyesababisha dhoruba baharini na dhoruba hiyo kutulia baada ya kutupwa majini — ndivyo hali itakavyokuwa DRC pindi Tshisekedi atakapoondoka madarakani.
“Yona ndiye aliyekuwa chanzo cha dhoruba, na baada ya kutupwa baharini, mawimbi yalitulia,” alisema Nangaa. “Tshisekedi ni kama Yona wa DRC. Siku tutakapomuondoa madarakani, mapigano yatakwisha na amani itarejea.”
Kauli hizi zimetolewa wakati ambapo AFC/M23 ilikutana hivi karibuni ana kwa ana na serikali ya Kongo kwa mara ya kwanza huko Doha, Qatar — mazungumzo ambayo wengi wameyatafsiri kama hatua ya awali kuelekea kusitisha vita vilivyodumu kwa karibu miaka mitano mashariki mwa Jamhuri ya Kidemokrasia ya Kongo.
