Mu gihe amakimbirane yiyongera mu burasirazuba bwa DRC, Abagaba Bakuru b’Ingabo za Congo n’u Burundi kuri uyu wa Gatatu ushize bahuriye muri Uvira mu nama yabereye mu muhezo mu gace gatutumbamo intambara, inama bivugwa ko ishobora kuzana impinduka zikomeye mu bikorwa bya gisirikare byo kurwanya M23.
Inama yo mu rwego rwo hejuru yabaye kuri uyu wa Gatatu, itariki 14 Gicurasi muri Uvira, mu burasirazuba bwa Repubulika ya Demokarasi ya Congo. Yahuje Umugaba Mukuru w’Ingabo za DRC (FARDC), Lt. Gen. Jules Banza Mwilambwe, na mugenzi we, General Prime Niyongabo, Umugaba Mukuru w’Ingabo z’igihugu cy’u Burundi (FDNB).
Aba basirikare bakuru bombi, bivugwa ko bari baherekejwe n’ingabo nyinshi z’u Burundi, bambutse umupaka wa Kavimvira mbere yo kwerekeza mu gice cy’ibikorwa bya Sokola 2 mu majyepfo muri Kivu y’Amajyepfo. Muri kariya gace, hafi y’imirongo iheruka y’urugamba, niho baroye inama mu muhezo.
Umuturage wo muri Uvira wavuganye n’urubuga rwa SOS Médias Burundi dukesha iyi nkuru yagize ati: “Kuva saa mbiri kugeza saa kumi n’iminota 35, aba bayobozi bari bari hariya.” Ntabwo tuzi icyo bavuganye kuko banze kutwakira. ”
Iyi nama ibaye mu gihe amakimbirane hagati ya FARDC, imitwe yitwara gisirikare ya Wazalendo n’Ingabo z’u Burundi na yo akomeje kwiyongera, cyane cyane mu bice bya Katogota na Kamanyola. Imitwe yitwara gisirikare ya Wazalendo irashinja imitwe imwe y’Abarundi kudindiza ibitero kuri M23, umutwe w’inyeshyamba urwanya ubutegetsi umaze gushinga imizi mu burasirazuba bw’igihugu.
Twabibutsa ko Igisirikare cy’u Burundi (FDNB) cyohereje ingabo zigera ku 10,000 mu rwego rwo gushyigikira FARDC n’imitwe yitwara gisirikare ya Wazalendo, aba ba nyuma bakaba bashyigikiwe kandi bakagenzurwa n’abayobozi ba Congo. Hamwe na hamwe, izi nyeshyamba ziragerageza gukumira iterambere rya M23, igenda ifata uduce twinshi tw’ingenzi kuva umwaka watangira, harimo imirwa mikuru y’intara za Kivu y’Amajyepfo na Kivu y’Amajyaruguru.
Amakuru aturuka mu nzego z’umutekano avuga ko uruzinduko rw’abayobozi bombi b’ingabo rushobora kuba rwari rugamije gutangaza ubwiyongere bw’imbaraga mu bufatanye mu bikorwa byo kurwanya inyeshyamba za M23. Umusesenguzi wavuganye n’urubuga dukesha iyi nkuru yagize ati: “Barimo kwitegura intambara. Ibikoresho bishya bya gisirikare byarabonetse, harimo indege zitagira abapilote ziri i Kindu (Maniema) n’i Bujumbura.”
Imirwano iherutse kwiyongera mu turere twinshi two muri Kivu y’Amajyepfo, cyane cyane mu gace ka Kaziba (Teritwari ya Walungu) na Rugezi (Teritwari ya Fizi), aho Ingabo za Congo zishyigikiwe n’inyeshyamba zaho n’Ingabo z’Abarundi, zikunze gukozanyaho n’inyeshyamba za M23 n’umutwe wa Twirwaneho.
Inama yarangiye nyuma ya saa sita. Ahagana mu ma saa kumi n’iminota 50, abajenerali bombi bahagurutse Uvira berekeza i Bujumbura ntacyo batangarije abanyamakuru, hasigara gushidikanya ku byemezo byafashwe muri iyi nama yabaye mu muhezo ariko itari ibanga.
