Imirwano yadutse mu gitondo cyo ku Cyumweru, itariki ya 18 Gicurasi, hafi ya Nyamamba, umujyi uri ku nkombe z’Ikiyaga cya Albert, nko mu birometero mirongo itandatu uvuye i Bunia, mu ntara ya Ituri. Igisirikare cya Congo kivuga ko cyongeye gusubiza ibintu mu buryo, ariko kikaba kimaze iminsi ine gihura n’ibitero bya hato na hato muri kariya karere.
Nk’uko Igisirikare cya Repubulika ya Demokarasi ya Congo (FARDC) kibitangaza, ngo ibi bikorwa by’ubugizi bwa nabi biri gukorwa n’abarwanyi ba Thomas Lubanga warekuwe n’Urukiko Mpuzamahanga Mpanabyaha, wongeye gutangiza umutwe wa politiki na gisirikare kuva muri Werurwe. Agace kibasiwe, aho imirwano yabereye, kagera kure ya Nyamamba.
Kuri iki Cyumweru, itariki ya 18 Gicurasi, ku manywa, ituze ryari ryagarutse i Nyamamba ndetse no mu duce twa Katoto, Malabo na Lopa. Tumwe muri utwo duce duherereye nko muri kilometero mirongo itatu uvuye muri Bunia.
Kuva ku wa Kane, itariki ya 15 Gicurasi, utu turere twagaragayemo imirwano ikaze nk’uko iyi nkuru dukesha RFI ikomeza ivuga. Imirwano irimo intwaro ziremereye n’izoroheje yahuje Ingabo za Congo n’inyeshyamba. Ku wa Gatandatu, itariki ya 17 Gicurasi, FARDC yagabye igitero simusiga i Lopa, igisubizo kibonwa ko cyari “gikomeye” na sosiyete sivile yaho.
Bivugwa ko inyeshyamba zasubijwe inyuma. Zimwe zari zambaye imyenda ya gisivili, abandi bambaye gisirikare. Bari bitwaje imbunda za AK-47, zikunze kugaragara muri kano karere. Nk’uko igisirikare kibitangaza, ngo izo nyeshyamba zahungiye mu mashuri no mu nsengero, bitakigeramo abantu nyuma yo guhunga kw’abaturage.
Nk’uko FARDC ibivuga, abategetsi ba gisirikare barashinja ihuriro CRP-Zaire kuba inyuma y’ibi bitero, bayobowe na Thomas Lubanga. Uyu wahoze ari umuyobozi w’umutwe wa UPC, wahamijwe ibyaha n’Urukiko Mpuzamahanga Mpanabyaha, kuri ubu ngo yaba ari muri Uganda.
