Man. City yahanishijwe kumara imyaka ibiri idakina amarushanwa ya UEFA

Ikipe ya Manchester City yo mu gihugu cy’Ubwongereza, yaciwe amande ya miliyoni 30 z’ama-Euro, inahanishwa kumara imyaka ibiri idakina amarushanwa ategurwa n’impuzamashyirahamwe y’umupira w’amaguru ku mugabane w’Uburayi, UEFA.

Ibi bihano biremereye Man City yabifatiwe, nyuma yo kwica amabwiriza ajyanye no kugura no kugurisha abakinnyi ya UEFA azwi nka Financial Fair Play. Financial Fair Play igena ko hatagomba kubaho ubusumbane hagati y’amafaranga ikipe itskaza igura abakinnyi n’ayo yinjiza mu bo yagurishije.

Itangazo UEFA yasohoye mu kanya kashize, rivuga ko Manchester City yakoze ariya makosa hagati y’umwaka wa 2012 n’uwa 2016, aho yakoresheje amafaranga y’umurengera yahawe n’abaterankunga igura abakinnyi.

Iyi kipe Kandi yashinjwe kunanirwa gukorana n’urwego rukurikirana uko amakipe yakoresheje amafaranga mu gihe yakorwagaho iperereza.

Manchester City binyuze mu itangazo yasohoye, yavuze ko yababajwe cyane na biriya bihano ariko ikaba itatunguwe na byo. Iyi kipe y’umutoza Pep Guardiola yavuze ko igikurikiyeho ari ukujyana ubujurire bwayo mu rukiko rwa Sports, TASS.

Mu gihe ibihano bya Manchester City byaba bigumyeho, bisobanuye ko Ikipe izarangiza ku mwanya wa gatanu muri shampiyona y’Abongereza uzahabwa amahirwe yo gukina UEFA Champions League mu kimbo cy’iyi kipe.

Bisobanuye ko Shifield United ya gatanu ari yo yahita ibyungukiramo mu gihe Premier league yaba irangiye uko ihagaze magingo aya.