Mu bikorwa by’indashyikirwa byo kwimakaza umutekano n’amahoro, abaturage bo mu gace ka Ndendere, muri komine ya Ibanda mu mujyi wa Bukavu, bamaze gushyikiriza inzego z’umutekano za M23 imbunda 189 ku bushake kuva uyu mujyi wa fatwa muri Gashyantare 2025.
Izi ntwaro zari zinyanyagiye hirya no hino mu baturage ndetse bazitunze mu buryo budakurikije amategeko zikaba zarashyikirijwe inzego z’umutekano za M23 binyuze mu bufatanye bw’abaturage, abayobozi b’ibarabara ndetse n’izindi nzego z’umutekano.
Ubuyobozi bw’aka gace buvuga ko ifatwa ry’izi ntwaro ryaturutse ku bukangurambaga bwatangijwe tariki 15 Gashyantare 2025, butangizwa na Albert Migabo Nyagaza, umuyobozi wa quartier ya Ndendere, ku bufatanye n’abayobozi b’ibarabara.
Ibi bikaba byarakozwe mu rwego rwo ukugabanya ibyaha by’ubugizi bwa nabi byari bimaze gufata intera ndende muri aka gace bugakorwa bukoreshejwe intwaro birimo ubwicanyi n’ubujura bwa hato na hato.
Albert Nyagaza yagize ati:“Twifashishije inama n’ubukangurambaga twakoze mu baturage, abaturage bagenda bumva neza akamaro ko gusubiza imbunda ku buhake. Bamwe bagiye baziha abayobozi bandukanye, abandi bakazisiga ku biro by’abayobozi, ku mapositi ya polisi cyangwa se ahantu hazwi tukazifata tukazibika”.
Akomeza avuga ko ibi bikorwa byo gukusanya intwaro byagaragaje uko abaturage batangiye kwiyumvamo uruhare rwabo mu kubungabunga umutekano kuko ngo hari n’izagiye zatoragurwa mu bishanga, mu mihanda, mu byobo by’amazi, ndetse hari n’izashyizwe ku miryango y’abayobozi byose bigakorwa mu ibanga no mu mutuzo, nta gahato.
Iyi gahunda ije kunganira izindi ngamba igihugu cyashyizeho zo kurwanya intwaro zitemewe, harimo na gahunda ya DDRRR (Démobilisation, Désarmement, Réinsertion, Rapatriement et Réintégration) igamije gufasha abahoze mu mitwe yitwaje intwaro gusubira mu buzima busanzwe.
Iki gikorwa cy’i Bukavu kigaragaza ko iyo ubuyobozi bwegereye abaturage, amahoro ashoboka kandi kuba abaturage baratanze intwaro ku bushake bigaragaza icyizere bafitiye inzego zibayobora no kwishimira imikorere y’inzego z’umutekano.
Ubuyobozi bwa Ndendere burashimira ubwitange bw’abaturage n’inzego z’ibanze, bunasaba abandi baturage bafite intwaro zitemewe ko bakwigira ku bandi bakazishyikiriza ubuyobozi, batikanga gukurikiranwa, ahubwo bagafatwa nk’abafatanyabikorwa b’amahoro.
