Kiongozi wa Ujumbe wa Umoja wa Mataifa wa Kulinda Amani katika Jamhuri ya Kidemokrasia ya Kongo (MONUSCO), Bintou Keita, alikutana Ijumaa na viongozi wa Muungano wa Mto Kongo (AFC) ambao unajumuisha kundi la waasi la M23.
Bintou Keita yuko mjini Goma, jiji lililo chini ya udhibiti wa M23 tangu Alhamisi tarehe 12 Juni.
Ijumaa hii, yeye pamoja na ujumbe wake walipokelewa na viongozi wa juu wa M23/AFC, akiwemo mratibu wa muungano huo Corneille Nangaa na naibu wake Bertrand Bisimwa.
MONUSCO kupitia ukurasa wake wa X (zamani Twitter) ilieleza kuwa mkutano huo ulikuwa na lengo la “kujadili utekelezaji wa majukumu ya ujumbe huo, yakiwemo ulinzi wa raia.”
Alipowasili Goma siku ya Alhamisi, Keita alisema kuwa alikuja kusikiliza na kuungana kwa mshikamano na wakazi wa jiji pamoja na wafanyakazi wa MONUSCO.
Akasema: “Nimekuja kuwasikiliza na kushirikiana na wakazi wa Goma pamoja na wafanyakazi wa MONUSCO. Uvumilivu wenu unaonekana wazi kwa kila mtu.”
Hii ni mara ya kwanza kwa Bintou Keita kufika Goma tangu M23 walipochukua udhibiti wa jiji hilo mwishoni mwa Januari mwaka huu.
Mkutano huu unafanyika huku kundi la M23 likiwa limekuwa likizishutumu mara kwa mara vikosi vya MONUSCO, kwa madai ya kushirikiana na jeshi la serikali ya Kongo katika mapigano yao.
