Jeshi la Rwanda linasema kwamba kundi la waasi wa FDLR linakadiriwa kuwa na kati ya wapiganaji 7,000 hadi 10,000, na kwamba bado ni tishio kubwa kwa usalama wa taifa.
Hayo yalisemwa na Msemaji wa Jeshi la Ulinzi la Rwanda, Brigedia Jenerali Ronald Rwivanga, alipofanya mahojiano maalum na mwandishi wa habari wa Kongo, Fiston Mahamba.
Alipoulizwa kuhusu idadi ya wanachama wa FDLR, Brig. Gen Rwivanga alisema:
“Wanakadiriwa kuwa kati ya 7,000 na 10,000, lakini hujichanganya na raia wakati wanaposhambuliwa.”
Kuhusu walipo, alisema wengi wao wako katika maeneo mbalimbali ya Kivu Kaskazini na Kusini mashariki mwa DRC, pamoja na katika msitu wa Kibira nchini Burundi.
Serikali ya Rwanda imeshawahi kueleza mara kadhaa wasiwasi wake kuhusu kundi hili ambalo linajumuisha waliokuwa na ushiriki katika mauaji ya kimbari ya 1994 dhidi ya Watutsi. Wasiwasi uliongezeka baada ya kubainika kuwa FDLR wameshirikiana na serikali ya Kongo katika mipango ya kuvamia Rwanda.
Rwivanga alitaja mashambulizi ya pamoja ya Kinshasa na FDLR dhidi ya raia wa Rwanda walioko mpakani, kama shambulio la Kinigi la mwaka 2022 na mashambulizi ya hivi karibuni katika eneo la Rubavu, akisisitiza kuwa FDLR bado ni tatizo kubwa.
Alisema kuwa ni jambo la kushtua kwamba DRC haihofii uwepo wa kundi la kikatili kama hilo kwenye ardhi yake.
Rwivanga alihitimisha kwa kusema kwamba FDLR inaendelea kuharibu mahusiano kati ya Rwanda na DRC, na akasisitiza kwamba suluhisho la kidiplomasia litakuwa bora zaidi kuliko matumizi ya nguvu za kijeshi.
