Impunzi y’Umunyarwanda y’imyaka 23 yishwe nyuma yo guterwa icyuma hafi y’inkambi y’impunzi ya Kavumu mu burasirazuba bw’u Burundi.
Impunzi eshatu z’Abanyekongo zatawe muri yombi mu rwego rw’iperereza kuri ubu bwicanyi bivugwa ko bwakozwe mu ijoro ryo ku itariki ya 11 Kamena.
Uyu mwana wahohotewe witwa Youssef, yagabweho igitero hafi y’ikigo cyitwa Kumuheto, hafi y’igipolisi gitanga umutekano mu nkambi ya Kavumu iherereye mu Ntara ya Cankuzo.
Abatangabuhamya benshi bavuga ko uyu musore yari atashye avuye ku kazi ku kabari na resitora biri hafi aho, ubwo yagabwagaho igitero n’abamuteye.
Nyuma yo gukubitwa no guterwa icyuma, yahise ajyanwa mu bitaro bya Ruyigi, ari naho yapfiriye nyuma y’amasaha make.
Umwe mu nshuti ze na we w’Umunyarwanda yagize ati: “Youssef yari umuntu utuje, wubahwa na bose. Yakoranaga umwete kugira ngo yikure mu bibazo mu cyubahiro. Ubugingo bwe buruhukire mu mahoro. Turasaba ubutabera”.
Abakekwaho icyaha batatu batawe muri yombi n’Igipolisi cy’u Burundi mu rwego rw’iperereza rikomeje kuri ubu bwicanyi ni impunzi eshatu z’Abanyekongo.
Iyi nkuru dukesha SOS Medias Burundi ivuga ko Youssef yashyinguwe ku wa Gatanu, itariki ya 13 Kamena, imbere y’imbaga nini y’abamuherekeje.
Inkambi ya Kavumu kuri ubu icumbikiye impunzi zirenga 18.000, ziganjemo izavuye muri Repubulika ya Demokarasi ya Congo, ariko ngo harimo n’Abanyarwanda n’impunzi zavuye muri Sudani y’Epfo.
