Kuri uyu wa Gatatu ushize, Ingabo zishinzwe kubungabunga amahoro z’u Rwanda (RWABATT-1), mu butumwa bw’Umuryango w’Abibumbye muri Repubulika ya Centrafrica (MINUSCA), zahawe imidari y’ishimwe kubera ibikorwa by’indashyikirwa mu mezi cumi na kumwe ashize.
Ibirori byo gutanga imidari byabereye mu kigo cya RWANBATT cya M’Poko i Bangui.
Mu gihe cyo koherezwa kwabo, iryo tsinda ryagize uruhare runini mu kurinda abasivili, kurinda Perezida wa Repubulika ya Centrafrica n’umuryango we, kurinda abayobozi bo mu rwego rwo hejuru ba MINUSCA, no gutanga umutekano ku Kibuga cy’indege Mpuzamahanga cya Bangui.
Umuhango wo gutanga imidari y’Umuryango w’Abibumbye wari uyobowe n’Umuyobozi w’Ingabo za MINUSCA, Lt. Gen. Humphrey Nyone, washimye Ingabo z’u Rwanda kubera ubuhanga bwazo, imyitwarire yabo, ndetse n’ubwitange mu bikorwa byo kubungabunga amahoro atari muri Repubulika ya Centrafrica gusa no ku Isi yose.
Ati: “Mw’izina rya MINUSCA, ndashaka gushimira byimazeyo RWABATT-1 ku bw’imirimo mukora kandi mukaba mwihuta mu gutabara. Mwagaragaje buri gihe imitekerereze myiza muri aya mezi cumi na kumwe. Ndashaka kandi gushimira byimazeyo, mbinyujije kuri Ambasaderi w’u Rwanda uri hano, Repubulika y’u Rwanda ku nkunga idahwema atari kuri MINUSCA gusa, ahubwo ku mikorere yose y’Umuryango w’Abibumbye. Inkunga y’u Rwanda mu butumwa bwo kubungabunga amahoro ni iy’agaciro ”.
Umuyobozi mukuru wa RWABATT-1, Lt. Col. Alphonse Kigenza, yashimiye ubuyobozi n’inkunga bahawe n’abafatanyabikorwa batandukanye anashimira ubwitange n’ubudahangarwa by’abagabo n’abagore ayoboye.
Uyu muhango witabiriwe n’abanyacyubahiro benshi, barimo Olivier Kayumba, Ambasaderi w’u Rwanda muri Repubulika ya Centrafrica; Maj. Gen. Freddy Sakama, Umugaba Mukuru wungirije w’Ingabo za Centrafrica; abayobozi bakuru muri Loni hamwe n’Abanyarwanda batuye muri CAR.
