Mgogoro unaendelea kukua kati ya Beijing na Taipei katika Taiwan, nchi yenye wakazi milioni 23.5, hali inayotia hofu kwamba vita vinaweza kuzuka ghafla.
Baada ya kuandamana na Makamu wa Rais wa Marekani J.D. Vance kwenye kongamano la demokrasia mjini Munich mwezi Februari, Waziri wa Ulinzi wa Marekani Pete Hegseth alitoa tahadhari katika mkutano wa Shangri-La huko Singapore. Akizungumzia migogoro duniani, kiongozi huyo wa Marekani alionya tena katika jukwaa hilo muhimu la masuala ya kijeshi katika eneo la Indo-Pasifiki, akisema kwamba vita vinaweza kutokea katika eneo la Taiwan.
Gazeti la “L’Express” linaripoti kwamba mkuu huyo wa Pentagon anaona kuwa China inaongeza choko choko dhidi ya demokrasia ndogo ya watu milioni 23.5.
Mgogoro huu si mpya. Kwa miaka mingi, Washington imekuwa ikisisitiza kuwa China inapaswa kudhibitiwa. Kwa upande wake, Xi Jinping hajawahi kuficha nia yake ya “kuunganisha tena” China, na ameongeza bajeti ya kijeshi. Shambulizi haliwezi kupuuzwa: mwishoni mwa karne ya 17, jeshi la Mfalme Kangxi lilijiandaa kwa miaka kumi kuvamia Taiwan—na likafanikiwa.
Sasa, waziri wa ulinzi wa Marekani anasema kuwa uvamizi wa kijeshi unaweza kuwa karibu, na anasisitiza kuwa Marekani inataka kubaki kuwa polisi wa Pasifiki. Ikiwa vita vitatokea, itamaanisha kuwa Marekani ilishindwa kuzuia. Ndiyo maana Hegseth aliongeza makali ya hotuba yake, ili kuifanya mikakati ya kuzuia China kuaminika zaidi, kama anavyoeleza Jean-Pierre Cabestan, mtafiti wa Taasisi ya Asia.
Kiongozi huyo wa Pentagon si wa pekee kuonyesha wasiwasi. Rais wa Ufaransa Emmanuel Macron, aliyeitembelea Singapore hivi karibuni, pia alimkosoa Beijing, akisema: “Ikiwa tukikubali kuwa Urusi inaweza kuchukua sehemu ya ardhi ya Ukraine bila majibu yoyote, basi tutajuaje kuwa Taiwan haitakumbwa na hatima kama hiyo?”
China haioni suala la Taiwan kama ilivyo Ukraine.
Hii ndiyo sababu viongozi wa kikomunisti wa China walikosa mkutano wa Singapore, kwa sababu wao wanaichukulia Taiwan kama jimbo lao la 23. Beijing haitaki kulinganisha suala hili na Ukraine. Hii imekuwa msimamo wao tangu Mao Zedong atangaze mwaka 1959: “Uhusiano kati ya China na Taiwan ni tofauti na ule wa Ujerumani iliyogawanyika, Korea mbili au Vietnam mbili.”
Tangu wakati huo, Ujerumani na Vietnam ziliungana tena (chini ya demokrasia au ukomunisti), wakati Seoul na Pyongyang bado zimegawanyika.
Watu wa Taiwan, kama Waukraine, wanataka kuendelea kuwa na utawala wa kidemokrasia.
Baada ya Vita vya Pili vya Dunia, Chiang Kai-shek, kiongozi wa chama cha Kuomintang (Chama cha Kitaifa cha China), alianzisha serikali ya Jamhuri ya China (ROC) nchini Taiwan mwaka 1949, baada ya kushindwa na wakomunisti nchini China Bara. Alikimbilia Taiwan akiwa na watu takriban milioni mbili, akitoroka utawala mpya wa kikomunisti wa Mao Zedong.
Chiang alianzisha rasmi serikali ya ROC mjini Taipei mnamo Desemba 1949, na akaendelea na kazi ya urais kuanzia Machi 1950. China inadai kuwa Taiwan ni mojawapo ya majimbo yake.
