RDC: Abasirikare ba FARDC bibye imishahara y’abarimu muri Tshopo

Ahitwa Bafwasende, Abasirikare ba FARDC bo mu mutwe witwa Jungle barashinjwa gusahura amafaranga menshi ku wa Kane, itariki ya 3 Nyakanga, yari agenewe umushahara w’abarimu bo mu gice cya Bafwasende II, mu Ntara y’uburezi ya Tshopo I.

Saddam Tango, perezida w’ishyirahamwe ry’abarimu ba Bafwasende, yatangaje ko amafaranga yatwawe ari umushahara w’abarimu bo mu mashuri abanza ya Wanginda, Besele, Onali, na Bangwabi.

Aya mashuri aherereye muri Groupement ya Wanginda, Umurenge wa Barumbi nk’uko iyi nkuru dukesha actualite.cd ikomeza ivuga.

Saddam Tango ati: “Twahembwaga binyuze kuri Mpesa. Kubera ko amashuri ari kure ya centre ya Bafwasende, abarimu n’abayobozi b’ishuri bohereje amakarita yabo ya SIM hamwe n’intumwa ngo baze kubikuza amafaranga hano. Nyuma y’iki gikorwa, bageze i Gbado, itsinda ry’abasirikare ba Jungle batwaye amafaranga”.

Ihuriro ry’abarimu rivuga ko abarimu baguye muri iki gico “bakorewe iyicarubozo bagakubitwa.”

Kuri Saddam, buri shuri rifite byibuze abarimu batandatu, buri wese ahembwa amafaranga agera ku 280.000 Fc. Nk’uko akomeza avuga, abasirikare bo muri uyu mutwe wa Jungle banishora mu bikorwa byo gutoteza abaturage bidasiga n’abarimu.

Désiré Aliene yagize ati: “Abahagarariye sosiyete sivile i Bafwasende babajijwe kuri iki kibazo, bemeje ko” abaturage bahangayikishijwe n’imyitwarire y’ubugizi bwa nabi y’abasirikare ahitwa Opienge. Kuri PK 232, abatwara ibicuruzwa by’abacuruzi bishyura amafaranga 10,000 CFA kuri bariyeri ya FARDC “.

Désiré Aliene yongeyeho ati: “Tumaze kuvugana n’abayobozi b’abasivili n’abasirikare, kandi nta gisubizo kiboneka.”

Abajijwe kuri iki kibazo muri Kamena 2025, Umuyobozi wa Teritwari, Willy Simbiye, yari yahamagariye abaturage bo muri ako turere “gushyigikira” Ingabo z’igihugu.