Roman Starovoit, aliyekuwa Waziri wa Usafiri wa Urusi, amekutwa amefariki ndani ya gari lake, saa chache tu baada ya kufutwa kazi na Rais Vladimir Putin.
Asubuhi ya Jumatatu, Julai 7, Rais Putin alitoa agizo la kumfuta kazi Starovoit, lakini sababu ya kufukuzwa kwake haikutangazwa mara moja.
Baada ya saa chache, mwili wake ulikutwa karibu na jiji la Moscow, akiwa amepigwa risasi.
Wachunguzi wa jinai wa Urusi walisema kuwa tukio hilo linaonekana kuwa kujitoa uhai, kwa mujibu wa Shirika la Habari la TASS.
Vyombo vya habari vya ndani viliripoti kuwa bastola ya mkono ilikutwa karibu na mwili wake.
Starovoit aliteuliwa kuwa Waziri wa Usafiri mnamo Mei 2024.
Kabla ya hapo, alikuwa Gavana wa Mkoa wa Kursk, eneo lililo kwenye mpaka wa Urusi na Ukraine, kwa kipindi cha miaka mitano.
Habari kutoka kwa shirika la Reuters zilieleza kuwa kufukuzwa kwake huenda kulihusiana na uchunguzi wa tuhuma za ufisadi zilizokuwa zikimkabili.
