Turkiya yashimye amasezerano Qatar ishimirwa gutuma agerwaho, yasinyiwe i Doha hagati ya Repubulika ya Demokarasi ya Congo (DRC) n’umutwe wa M23 (AFC / M23), yatangaje ivuga ko ari intambwe ikomeye iganisha ku mahoro mu karere.
Minisiteri y’Ububanyi n’Amahanga ya Turkiya yagize iti: “Iri tangazo ni intambwe y’ingenzi iganisha ku mahoro n’igisubizo kirambye mu gukemura amakimbirane mu burasirazuba bwa DRC.”
Minisiteri yagize iti: “Twishimiye uruhare rwubaka mu gutekanisha no guteza imbere Akarere k’Ibiyaga Bigari n’abagize uruhare bose muri iki gikorwa, cyane cyane Qatar, Umuryango wa Afurika y’Iburasirazuba n’Umuryango w’Iterambere w’Ibihugu bya Afurika y’Amajyepfo”.
Iri tangazo ryongeye gushimangira icyemezo cya Turkiya cyo gushyigikira ingufu zose zigamije guteza imbere amahoro, umutekano n’ituze muri Afurika nk’uko iyi nkuru dukesha Ibiro Ntaramakuru bya Turkiya, Anadolu Agency, ivuga.
Itangazo ry’Amahame ryashyizweho umukono ku wa Gatandatu n’abahagarariye impande zombi, nyuma y’ibyumweru by’ibiganiro bya diplomasi.
Amasezerano yo ku wa Gatandatu yagezweho nyuma y’ibyumweru u Rwanda rusinyanye amasezerano y’amahoro na Congo ku itariki ya 27 Kamena, i Washington, ibikomeza gutanga icyizere cyo guhagarika imirwano ikaze ibera mu burasirazuba bwa Congo nubwo hagitegerejwe uko impande zombi zizashyira mu bikorwa ibyo ziyemeje.
