Inteko ishinga amategeko ya Djibouti yakuyeho imyaka ntarengwa ku bakandida b’umukuru w’igihugu, nyuma yo gutora ku bwiganze bw’amajwi yose ku Cyumweru.
Ibi byafunguye inzira ku Perezida Ismail Omar Guelleh, w’imyaka 77, kugira ngo ashobore kongera kwiyamamaza mu matora yo muri 2026.
Guelleh amaze ku butegetsi kuva mu 1999, akaba ayobora igihugu gito cyo mu ihembe ry’Afurika, gifite agaciro gakomeye kubera ko kirimo ibirindiro by’ingabo z’ibihugu nka Leta Zunze Ubumwe za Amerika, Ubufaransa, Ubushinwa, Ubuyapani n’Ubutaliyani.
Umuvugizi w’Inteko, Dileita Mohamed Dileita, yavuze ati: “Inteko Ishinga Amategeko yemeje ku mugaragaro ikurwaho ry’itegeko ryagengaga imyaka ntarengwa, none byemewe.”
Iri tegeko ryatowe bwa mbere mu cyumweru gishize, risubizwa na Perezida Guelleh ubwe kugira ngo risuzumwe bwa nyuma. Abadepite bavuze ko impinduka z’amategeko zigamije “kubungabunga ituze n’umutekano w’igihugu gito kiri mu karere kavugwamo amakimbirane, nka Somaliya, Etiyopiya na Eritrea.”
Guelleh yatsinze amatora yo mu 2021 ku majwi 97%, naho ishyaka rye Union for the Presidential Majority rifite imyanya myinshi mu Nteko Ishinga Amategeko.
Djibouti ifite abaturage bagera ku miliyoni imwe, ariko iri ku nzira y’ubucuruzi ikomeye ya Bab El-Mandeb, ku nyanja itukura.
Mbere y’uko amategeko ahindurwa, umuntu wese urengeje imyaka 75 ntiyemererwaga kwiyamamariza kuyobora igihugu cya Djibouti.
Ubu rero, nyuma yo gukuraho iyo myaka ntarengwa, Perezida Ismail Omar Guelleh, ufite imyaka 77, yemerewe kongera kwiyamamaza mu matora ateganyijwe kuba mu Mata 2026.
