Leta ya Uganda igiye gufungurira umupaka impunzi zigera ku 3000 z’abanyekongo zimaze igihe kirenga gato ukwezi zikambitse ku mupaka wa Bunagana uhuza ibihugu byombi. Ni nyuma y’aho hadutse ubushyamire hagati y’ingabo za kongo n’imitwe irwanira mu burasirazuba bwayo.
BBC ivuga ko impamvu nyamukuru yateye Uganda kubuza abo Banyekongo kwinjira muri Uganda ahanini zishingiye ku kuba batizeye neza ko nta coronavirus barwaye.
Kuri uyu wa Gatatu ni bwo leta ya Uganda yatangaje ko igiye kwemerera aba Banyekongo kwinjira ku butaka bwa Uganda, gusa bakabanza gushyirwa mu kato kimwe n’abandi bose binjira ku butaka bwa Uganda mu gihe kingana n’iminsi 14.
Leta ya Uganda ikomeza ivuga ko iminsi 14 bazayimara mu kigo gishya giherereye ku birometero 13 uvuye ku mupaka gisanzwe na none gikorerwamo ibikorwa byo gupima no kuvura abanduye coronavirus.
Ishami ry’Umuryango w’Abibumbye ryita ku mpunzi, UNHCR rivuga ko hazafatwa ibipimo ku mpunzi zose kugira ngo harebwe abadafite ubwandu bwa Coronavirus.
Ibi ngo bizafasha ababishinzwe kumenya igihe bazajyanwa mu nkambi.
Ni mu gihe kandi imiryango nterankunga igaragaza ko kubahiriza amabwiriza yo kutegerana n’isuku mu nkambi z’impunzi bikiri imbogamizi mu guhangana na Coronavirus.
Umuryango w’Abibumbye uvuga ko uhangayikishijwe n’umubare munini w’impunzi z’Abanyekongo, aho kugeza ubu muri RDC honyine habarurwa abantu barenga miliyoni 5 bavanwe mu byabo n’intambara y’ingabo za Leta n’imitwe yitwaje intwaro ikorera mu burasirazuba.
Abamaze kwandura coronavirus muri Uganda bararenga 900, mu gihe 52 muri bo ari impunzi zibayo.
