Ingabo za Ukraine zatangaje ko zagushije helikopteri y’igisirikare cy’Uburusiya yo mu bwoko bwa Mi-8 mu gace ka Rostov, bakoresheje drone yo mu bwoko bwa deep-strike, ku nshuro ya mbere kuva intambara yatangira.
Ibyo byatangajwe n’Urwego rw’Abasirikare bihariye rwa Ukraine (SSO) ku rubuga rwa Telegram kuri uyu wa 23 Ugushyingo, nubwo batanatangaje amatariki n’amakuru arambuye y’igikorwa cyabaye.
SSO yagize iti: “Turimo guhindura amategeko y’umukino, ubu natwe turahiga!”
Helikopteri ya Mi-8, yakozwe mu gihe cy’Ubumwe bwa Soviet mu myaka ya 1960, izwiho gutwara abasirikare, ibikorwa by’intambara n’imirimo y’ubutabazi. Isanzwe ikoreshwa cyane mu bihugu byinshi.
Mu bihe bishize, izi helikopteri zimaze kuba intego y’ibitero bya Ukraine, birimo ibyabereye muri Crimea no mu Ntara ya Bryansk.
Itsinda ry’Abashakashatsi ba Black Bird Group rivuga ko kuva muri Nzeri 2025, ingabo z’Uburusiya zimaze kwigarurira ahantu 15 muri Zaporizhzhia, zikabyaza umusaruro imvura y’iki gihe n’ikibazo Ukraine ifite cy’abasirikare bake.
Abasesenguzi bavuga ko intambara ikomeje gukomera mu bice bitandukanye, harimo n’umujyi wa Pokrovsk muri Donetsk, aho ingabo z’Uburusiya zikomeje kwigarurira gahoro gahoro.
Ukraine yo ivuga ko hari bimwe mu bice yasubiyemo inyuma kugira ngo ikize abasirikare bayo.
