Samuel Eto’o, wahoze ari rutahizamu w’ikipe y’igihugu ya Cameroun, yongeye gutorerwa kuyobora Ishyirahamwe ry’Umupira w’Amaguru muri Cameroun (FECAFOOT) mu matora yabaye ku wa Gatandatu, tariki ya 29 Ugushyingo 2025, i Mbankomo.
Mu matora yabereye ku Kigo cya CAF Excellence Centre, Eto’o wari umukandida wenyine yabonye amajwi 85 kuri 87, andi majwi abiri agirwa impfabusa. Ibi bitumye akomeza kuyobora FECAFOOT indi myaka ine.
Mbere y’amatora, Eto’o yakiriye ku buryo bwihariye Umuyobozi w’Akarere ka Mbankomo, baganira ku buryo ibikorwa by’amatora byagenzurwa neza, bikagenda mu mutekano no mu mucyo. Uko kungurana ibitekerezo byari bigamije kwirinda imvururu n’akaduruvayo byagiye bivugwa mu minsi yashize mu miyoborere ya FECAFOOT.
Amatora yo kongera gutora Eto’o aje mu gihe hashize iminsi havugwa byinshi ku mikorere y’iri shyirahamwe, harimo ibirego n’impaka zatangwaga n’abatavuga rumwe n’ubuyobozi bwe. Nyamara, abagize Inteko Rusange bagaragaje ko bamugiriye icyizere cya buri gihe, bamugenera manda nshya.
Samuel Eto’o yashimiye abanyamuryango bamugiriye icyizere, yizeza ko manda nshya izibanda ku guteza imbere ruhago yo mu gihugu imbere, guteza imbere amarushanwa y’abakiri bato, no kongera imiyoborere ishingiye ku mucyo no ku bufatanye.
