Kuri uyu wa 6 Nyakanga 2020, mu Burundi hatangijwe ubukangurambaga ku bantu bose mu guhangana na Covid-19, bwa mbere abayobozi bakuru bagaragara bambaye udupfukamunwa.
Kuva Covid-19 yagera mu Burundi tariki 31 Werurwe ni bwo bwa mbere hafashwe ibipimo byinshi ku munsi umwe, bigera kuri 640. Ni ubukangurambaga bushya bwo gupima abantu benshi bwatangijwe ejo ku wa mbere na Minisiteri y’Ubuzima mu Burundi.
Ubutegetsi bwa Perezida Nkurunziza bwagiye bunengwa cyane kujenjekera iki cyorezo, aho abagize guverinoma bahuraga uko bashatse nta n’umwe ukurikije amabwiriza yo kurwanya Covid-19.
Perezida Evariste Ndayishimiye ubwo yakiraga indahiro z’abagize guverinoma nshya, ku wa 30 Kamena, yasabye buri Murundi wese gufata Covid-19 nk’umwanzi w’ibanze wugarije igihugu cyabo.
Mu muhango wokwizihiza umunsi mukuru w’ubwigenge, Perezida Ndayishimiye yabwiye Abarundi ko bagomba kwirinda kwegerana, gusuhuzanya bahana ibiganza n’ibindi byose byatuma icyorezo gikwirakwira byihuse.
Pierre Nkurunziza wari Perezida w’u Burundi yanenzwe ko yafashe iki cyorezo nk’icyoroshye ndetse akabigaragaza mu mbwirwaruhame ze zitandukanye.
Ibi binashimangirwa n’ingamba zidahamye zo gupima, aho kuva iki cyorezo cyagera mu Burundi kugeza aho yitabiye Imana, hafashwe ibipimo 1,200.
Kuva Perezida Ndayishimiye yajya ku butegetsi, mu Burundi hamaze gufatwa ibipimo 19,00. Ishami ry’Umuryango w’Abibumye ryita ku buzima, OMS, ryanengeye u Burundi kudaha agaciro iki cyorezo, ibintu birakaza ubutegetsi bw’u Burundi bwanahise bwirukana uhagarariye OMS muri icyo gihugu muri Gicurasi.
Minisiteri y’Ubuzima itangiza ku mugaragaro ubukangurambaga bushya, yasabye Abarundi kujya bambara agapfukamunwa, igihe bagiye ahari abantu benshi no kwirinda gukoranaho, basuhuzanya mu rwego rwo kwirinda ikwirakwira rya Covid-19.
Kugeza uyu munsi mu Burundi, leta imaze gutangaza ko mu bipimo 3,200 bimaze gufatwa, byagaragaje ko abantu 191 banduye Covid-19, umwe muri bo yaramuhitanye, na ho abantu 118 bamaze kuyikira.
