Ikipe y’igihugu ya Aruba yanditse amateka yegukana igikombe cya mbere cya FIFA Series 2026 cyabereye i Kigali, nyuma yo gutsinda Liechtenstein ibitego 4-1 mu mukino wa nyuma w’Itsinda B wabereye kuri Kigali Pelé Stadium.
Uyu mukino wabaye ku Cyumweru, tariki ya 29 Werurwe 2026, usoza irushanwa ryari rimaze iminsi rikinirwa mu Rwanda ku bufatanye n’Ishyirahamwe ry’Umupira w’Amaguru ku Isi (FIFA). Wari umukino wari utegerejwe cyane kuko aya makipe yombi yari afite amahirwe angana yo kwegukana igikombe.
Aruba yatangiye umukino ifite imbaraga nyinshi, igaragaza inyota yo kwegukana igikombe. Nubwo Liechtenstein yagerageje kwihagararaho, Aruba yakomeje kuyisatira bikomeye.
Mu gice cya kabiri, ku munota wa 52, Liechtenstein yaje kubona igitego cyo kwishyura cyatsinzwe na Zünd, icyizere cyayo cyongera kuzamuka. Icyakora, Aruba ntiyacitse intege kuko yakomeje gusatira ishaka gutsinda.
Ku munota wa 69, umukinnyi Breinburg yatsindiye Aruba igitego cya gatatu cyayihesheje amahirwe akomeye yo kwegukana intsinzi. Mu minota y’inyongera, ku munota wa 90+4, Van Kilsdonk yatsinze igitego cya kane, ashimangira intsinzi ya Aruba.
Umukino warangiye Aruba itsinze ibitego 4-1, ihita yegukana igikombe cya FIFA Series ku nshuro ya mbere, mu mateka yayo. Umukinnyi Romano wa Aruba ni we wegukanye igihembo cy’umukinnyi mwiza w’irushanwa muri iri tsinda.
Mu mukino wo guhatanira umwanya wa gatatu, Tanzania yitwaye neza itsinda Macau ibitego 6-0, ihita yegukana uwo mwanya.
Kuri uyu wa Mbere, imikino ya nyuma y’Itsinda A irakomeza, aho kuri Stade Amahoro hateganyijwe umukino uzahuza Kenya na Grenada saa kumi z’umugoroba. Nyuma yawo, ikipe y’igihugu y’u Rwanda, Amavubi, irakira Estonia saa moya n’igice, mu mukino uzagena uwegukana igikombe cy’iri tsinda.
Amafoto
