Kuri uyu wa Kabiri tariki 20 Ukwakira 2020 ,Paul Rusesabagina uregwa ibyaha 13 yongeye kwitaba urukiko rwibanze rwa Kicukiro aho akurikiranweho ibyaha byo kurema no gutera inkunga umutwe wa FLN.
Ku itariki 02/10/2020, Urukiko Rwisumbuye rwa Nyarugenge rwatesheje agaciro ubujurire bwe ku cyemezo cyo gufungwa by’agateganyo yari yafatiwe n’Urukiko rw’Ibanze rwa Kicukiro.
Itegeko ryerekeye imiburanishirize y’imanza z’inshinjabyaha riteganya ko iyo iminsi 30 yasabwe n’Ubushinjacyaha irangiye bukiri mu iperereza, busubiza imbere y’urukiko uregwa bugasaba ko yongererwa iminsi yo gufungwa by’agateganyo.
Uyu munsi Rusesabagina Paul yazanywe mu rukiko aho arikumwe n’abamwunganira mu mategeko aribo Me David Rugaza na Me Emelyne Nyembo.
Rusesabagina wafatiwe ku kibuga cy’indege i Kanombe ku itariki 28 Kanama 2020, akurikiranyweho ibyaha 13 birimo :
1 kurema umutwe w’ingabo utemewe cyangwa kuwujyamo,
2 gutera inkunga iterabwoba,
3 iterabwoba ku nyungu za politiki,
4 gukora no kugira uruhare mu bikorwa by’iterabwoba,
5 gutanga amabwiriza mu gikorwa cy’iterabwoba,
(6) kuba mu mutwe w’iterabwoba.
(7) kugambana no gushishikariza abandi gukora iterabwoba,
8 ubufatanyacyaha ku cyaha cy’ubwicanyi buturutse ku bushake,
9 ubufatanyacyaha ku cyaha cyo gufata umuntu ho ingwate,
10 ubufatanyacyaha ku cyaha cyo kwiba hakoreshejwe intwaro.
11ubufatanyacyaha ku cyaha cyo gutwikira undi ku bushake inyubako,
12 ubufatanyacyaha ku cyaha cyo gukubita cyangwa gukomeretsa ku bushake
13 n’ubufatanyacyaha ku cyaha cyo gushyira abana mu mirwano cyangwa ngo bakore imirimo ijyanye n’inshingano za gisirikare.
Iburanisha ry’uyu munsi tariki 20 Ukwakira
Mu iburanisha
Paul Rusesabagna yasomewe umwirondoro we nk’undi munyarwanda, ahita awuhakana avuga ko uwo mwirondoro atari uwe. Yavuze ko we n’umuryango we atari Abanyarwanda.
Me David Rugaza wunganira Rusesabagina yasobanuriye urukiko ko umukiriya we ari Umubiligi, avuga ko we n’abagize umuryango we baretse ubwenegihugu bw’u Rwanda bari bafite, babwirwa ko mu gihe bazakenera ubwenegihugu bw’u Rwanda bagomba kongera kubusa. Aha ni naho Me Rugaza yavuze ko igihe cyose Rusesabagina atarasaba ubundi bwenegihugu, akwiye kuburanishwa nk’Umubiligi aho kuburana nk’Umunyarwanda.
Me Rugaza kandi yavuze ko ibyifuzo by’ubushinjacyaha byo gukomeza gufunga umukiliya we biteshwa agaciro, cyane ko ngo iyo ubushinjacyaha bufite ibimenyetso bugikusanya busaba hakiri kare ko iminsi y’ifungwa ry’agateganyo yiyongera bitandukanye no kuba babikora uregwa yarangije iminsi y’igifungo cye. Kuri iyi ngingo Me Rugaza wunganira Rusesabagina yasabye ko ahita afungurwa agakurikiranwa ari hanze.
