Polisi ya Uganda yatangaje abandi Banyarwanda n’Abanyekongo bo muri Repubulika ya Demukarasi ya Congo (RDC) 47, yataye muri yombi kuri uyu wa 5 Mutarama 2021.
Aba bafatiwe mu Karere ka Kabale, bari muri bisi yo mu bwoko bwa Isuzu ya sosiyete ya Jussy Coach yerekezaga mu murwa mukuru wa Uganda, Kampala.
Chimp Reports dukesha aya makuru, ntiyatangaje umubare w’Abanyarwanda cyangwa uw’Abanyekongo bafashwe, keretse igiteranyo cya bose.
Bafashwe nyuma y’abandi 13 bafatiwe muri bisi ya sosiyete yitwa Malaika kuri uyu wa 4 Mutarama 2021, barimo Abanyarwanda 9 n’Abanyekongo 4, aba bakaba baraturukaga mu Karere ka Kisoro nk’uko Umuvugizi wa Polisi ya Uganda muri Kabale, Brian Ampaire yabitangaje.
Brian Ampaire yavuze ko igikorwa cyo gufata aba bantu, cyakozwe nyuma y’aho yari imaze guhabwa amakuru ko hari imodoka zitwaye abinjiye mu gihugu mu buryo butemewe.
Aba bose ngo binjiye muri Uganda, bashaka kwerekeza mu duce twa Buganda na Bunyoro gushaka akazi.
Biteganyijwe ko bazajyanwa imbere y’ubutabera, bakaburanishwa ibyaha bifite aho bihuriye no kwinjira ku butaka bw’ikindi gihugu mu buryo butemewe n’amategeko.
