Perezida wa Repubulika ya Centrafrica (CAR) akaba n’Umugaba w’Ikirenga, Faustin Archange Touadéra kuri uyu wa 23 Gashyantare 2021 yashyikirije ingabo z’iki gihugu imodoka z’intambara.
Ni muhango wabereye ku kigo cy’imitozo ya gisirikare, witabiriwe n’abarimo Umugaba Mukuru w’Ingabo za CAR, Maj. Gen. Zephyrin Mamadou.
Perezida Touadéra washyikirije ingabo za CAR izi ntwaro
Izi ngabo zishyikirijwe ibi bikoresho mu gihe zikomeje urugamba rwo guhashya ihuriro ry’imitwe yitwaje intwaro rya CPC (Coaltion of Patriots for Change), ushyigikiye François Bozizé urwanya ubutegetsi bwa Touadéra.
Mu mpera z’umwaka w’2020 ni bwo mu bice bitandukanye bya CAR hatangiye kuvugwa ibitero bya CPC, nyuma y’aho Bozizé yari yangiwe kwiyamamariza umwanya w’Umukuru w’Igihugu.
Bitewe n’imbaraga iri huriro ryari rikomeje kugaragaza, byatumye Guverinoma ya CAR igirana amasezerano n’izindi Guverinoma zirimo iy’u Rwanda n’u Burusiya, ziyoherereza abasirikare badasanzwe bo gufasha ingabo zayo muri uru rugamba.
Nk’uko Guverinoma ya CAR ibyemeza, ingabo za Leta, iz’u Rwanda n’iz’u Burusiya zikomeje guhashya abarwanyi b’iri huriro bari barafashe igice kinini cy’igihugu, aho zigenda zisubiza uduce tumwe na tumwe mu maboko ya Leta.
Ku rundi ruhande kandi, hari izindi ngabo z’Umuryango w’Abibumbye ziri mu butumwa bw’amahoro (MINUSCA) nazo zikomeje kurinda n’amahoro by’abaturage. Izi ngabo nazo ziherutse kongerwaho izari mu butumwa nk’ubu zaturutse muri Sudani y’Epfo.
Ingabo za CAR zizifashisha izi ntwaro mu guhangana na CPC
Kurikira ibiganiro n’amavidewo binyura kuri Bwiza TV
