Perezida Magufuli yapfuye

Suluhu yatangarije iyi nkuru ku kigo cya Tanzania cy’itangazamakuru, TBC (Tanzania Broadcasting Corporation), aho avuga ko Perezida Magufuli yapfiriye mu bitaro by’i Dar es Salaam azize indwara y’umutima.

Yagize ati: “Ndabamenyesha ko uyu munsi tariki ya 17 Werurwe uyu mwaka w’2021, mu masaa kumi n’ebyiri y’umugoroba, twabuze Umuyobozi wacu ukomeye, Nyakubahwa Perezida Dr. John Pombe Magufuli.”

Hashize icyumweru hasakazwa amakuru avuga ko Perezida Magufuli arembejwe n’icyorezo cya Covid-19. Abanyapolitiki barimo Tundu Lissu bavugaga ko yabanje kuvurirwa muri Kenya, nyuma ajyanwa mu Buhinde. Gusa aya makuru Guverinoma ya Tanzania yarayamaganye, ivuga ko ari ibihuha.

Minisitiri w’Intebe wa Tanzania, Kassim Majaliwa yari yavuze ko abatangaza ko Perezida Magufuli atakigaragara mu ruhame, bakanabishingiraho bavuga ko arembye, babeshya kuko ngo ameze neza kandi afite akazi kenshi ahugiyemo mu biro.

Perezida Magufuli apfuye yari afite imyaka 61. Nta gihe kinini yari amaze atangiye kuyobora manda ya kabiri, kuko yarahiye tariki ya 5 Ugushyingo 2020, nyuma yo gutsinda amatora yo ku wa 28 Ukwakira 2020.

Yatangiye kuyobora Tanzania muri manda ya mbere mu mwaka w’2015, asimbuye Jakaya Mrisho Kikwete.

Kurikira ibiganiro n’amavidewo binyura kuri Bwiza TV