Polisi y’u Rwanda yatangaje ko kuri uyu wa 26 Kamena 2021 yafatiye muri resitora iherereye mu Murenge wa Nyarugunga w’Akarere ka Kicukiro umukobwa witwa Umugwaneza Liliane byagaragaye ko yanduye Covid-19, asangira n’umusore.
Uyu mukobwa wari ufite urugendo, ngo yagiye kwipimisha Covid-19 ku ivuriro ryo kwa Kanimba riherereye mu mujyi wa Kigali tariki ya 25 Kamena 2021, abaganga bamubwira ko yanduye nk’uko byemejwe na Dr Iradukunda Sonia ukora mu kigo cy’igihugu gishinzwe ubuzima RBC.
Dr Iradukunda yagize ati: “Yagiye kwa Kanimba kwipimisha bamubwira ko arwaye ariko abirengaho ntiyishyira mu kato. Abamupimye bari baduhamagaye batubwira ko hari umuntu tugomba kujyana i Kanyinya ariko nawe bamubwiye ko yishyira mu kato, abirengaho nkana.”
Umugwaneza ngo yanze kujya mu kato no kujyanwa mu kigo nderabuzima cya Kanyinya gisanzwe cyakira abarwayi ba Covid-19. Aratoroka, kuva ubwo Polisi itangira kumushakisha, kugeza ubwo yamufatiye muri iyi resitora asangira n’umusore witwa Karangwa Norbert.
Uyu mukobwa yemereye itangazamakuru ko koko yagiye kwipimisha kwa Kanimba, ariko akaba yafashwe na Polisi ataramenya ibisubizo bye. Ati: “Ejo ttariki ya 25 Kamena nagiye mu mujyi kwa Kanimba kwisuzumisha Covid-19, ubwo nari ntegereje ibisubizo ni bwo uyu munsi mu kanya tariki ya 26 Kamena mbonye bamfata ngo nanduye Covid-19.”
Umugwaneza yajyanwe i Kanyinya, Karangwa agirwa inama yo kwishyira mu kato bitewe n’uko haba hari ibyago ko yaba yandujwe iki cyorezo.
